नेपाल शिक्षक महासङ्घको आन्दोलनमा प्याब्सन र एन-प्यब्सनको ऐक्यबद्धता

चैत्र २६ । संस्थागत विद्यालयहरूका छाता संगठन प्याब्सन र एन-प्याब्सनले विगतमा सरकार र नेपाल शिक्षक महासङ्घबिच भएका सहमतिहरूलाई पूर्ण रूपमा कार्यान्वयन गर्न सरकारसँग आग्रह गरेका छन् । सहमतिको प्रभावकारी कार्यान्वयनले शिक्षा क्षेत्रमा विश्वास र स्थायित्व कायम गर्न मद्दत गर्ने भन्दै कार्यान्वयनलाई जोड् दिएका हुन् ।

आज प्याब्सन र एन प्याब्सनले संयुक्त रूपमा विज्ञप्ति जारी गरी वार्ता, संवाद, र आपसी समझदारीको माध्यमबाट मात्र दीर्घकालीन समाधान प्राप्त गर्न सकिने भएकाले त्यस तर्फ सरकारको गम्भीर ध्यान जान जरुरी रहेको र नेपाल सरकारसँग यथाशीघ्र शिक्षा ऐन जारी गर्न माग गरेका छन् ।

साथै नयाँ शैक्षिक सत्र प्रारम्भ भइरहेको अवस्थामा, शिक्षण–सिकाई प्रक्रियामा अवरोध आउनेतर्फ सजग हुनुपर्ने वर्तमान परिप्रेक्ष्यमा नेपाल सरकार र सबै सरोकारवाला पक्ष जिम्मेवार भई प्रस्तुत हुनुपर्ने उनिहरूको भनाई छ ।

यसैगरी निजी क्षेत्रको योगदानको सम्मान, निजी विद्यालयहरूसँग सम्बद्ध संस्थाहरू प्याब्सन र नेशनल प्याब्सन, शिक्षक महासङ्घको आन्दोलनका जायज मागहरूमा ऐक्यबद्धता प्रकट गर्दै विद्यालय बन्द बाहेकका सबै आन्दोलनका कार्यक्रमहरूमा साथ, सहयोग, र समर्थन रहेको जनाएका छन् ।