शैक्षिक सुधारका लागि जुम्लामा कचहरी

जुम्लाको तातोपानी गाउँपालिकाले सामुदायिक विद्यालयको शिक्षा सुधारका लागि शैक्षिक कचहरी बहस सुरु गरेको छ।

शैक्षिक कचहरीका माध्यमबाट यहाँका सामुदायिक विद्यालयमा शिक्षाको गुणस्तर सुधार गर्न अभियान थालिएको हो।

तातोपानी गाउँपालिकाका अध्यक्ष नन्दप्रसाद चौलागार्इंले पछिल्लो समय सामुदायिक विद्यालयको गुणस्तर खस्किँदै गएको अवस्थामा त्यसको जड पत्ता लगाउने लक्ष्यका साथ शैक्षिक कचहरी थालिएको बताए।

तातोपानीका २९  सामुदायिक विद्यालयलाई लक्षित गरी शैक्षिक कचहरी तीन चरणमा सञ्चालन गरिएको छ । पहिलो चरणमा यही वैशाख १६ गतेदेखि तातोपानी-१, २ र ३ भित्रका आठवटै सामुदायिक विद्यालयको शैक्षिक अवस्थाकोबारे बहस गरिएको छ ।

शैक्षिक कचहरीमा तीन वडाभित्रका राजनीतिक दलका प्रतिनिधि, प्रधानाध्यापक, विद्यालय व्यवस्थापन समितिका अध्यक्ष, शिक्षक, विद्यार्थी र आम नागरिकलाई एक ठाउँमा भेला गरेर छलफल गरिएको अध्यक्ष चौलागाईंले बताए।

सामुदायिक विद्यालयमा राज्यको करोडौँ रुपैयाँ लगानी छ, तर विद्यालयमा विद्यार्थी सङ्ख्या घटिरहेको छ । कतिपय कक्षा रित्तो बन्ने अवस्थामा छन्। बाँकी विद्यार्थीलाई गाउँमै रोक्ने वातावरण बन्न सकेन भने केही वर्षपछि विद्यालय नै रित्तो बन्ने अवस्था आउने अध्यक्ष चौलागाईं बताउँछन्।

आवश्यकताका आधारमा विद्यालय मर्ज गर्ने, शिक्षक व्यवस्थापन गर्ने, शैक्षिक गुणस्तरलाई लयमा ल्याउने उद्देश्यले शैक्षिक कचहरी कार्यक्रम सुरु गरिएको गाउँपालिका उपाध्यक्ष रेवती रावल बताउँछन्।

तातोपानी गाउँपालिकाका प्रमुख प्रशासकीय अधिकृत तीर्थ कठायतले पालिकाभित्रको शैक्षिक स्थिति दयनीय भएकाले सबैले आत्मालोचना गरेर सच्चिन जरुरी रहेको बताए। शैक्षिक कचहरीले शिक्षा सुधारमा टेवा पुग्ने उनको भनाइ छ।

“गाउँगाउँमा विद्यालय खोल्नु मात्रै उपलब्धि होइन, त्यसलाई व्यवस्थापन गर्नु ठूलो कुरा हो। शिक्षक, जनप्रतिनिधिलगायतका छोराछोरीलाई अनिवार्य सामुदायिक विद्यालयमा पढाउनुपर्र्छ, आवासीय शिक्षाको प्रबन्ध मिलाउनुपर्छ,” तातोपानी–१ बाइराँकाका वीरेन्द्र शाहीले भने।

विद्यालयको नियमन, अनुगमन, आवश्यकताका आधारमा मर्ज, विधि संवत् नचलेका विद्यालयलाई दण्डित गर्ने सवालमा पालिका कडा रुपमा पालिका लागेको छैन । कार्यसम्पादनका आधारमा विद्यालयलाई पुरस्कृत र दण्डित गर्नुपर्ने स्थानीयवासी सुनिता पाण्डेले बताए।

शिक्षा शाखा प्रमुख सुरतबहादुर शाहीले तातोपानी–१, २ र ३ का आठ सामुदायिक विद्यालयको वर्तमान अवस्थाबारे पालिकास्तरीय शिक्षा समितिले तयार पारेको प्रतिवेदन प्रस्तुत गर्नुभएको थियोे । प्रतिवेदन अनुसार विद्यार्थी सङ्ख्या निकै कम भएका विद्यालयलाई मर्ज गर्नुपर्ने देखिएको उनको भनाइ छ।

प्रर्याप्त शैक्षिक सामग्री अभावले अतिरिक्त क्रियाकलाप हुन नसक्दा र विद्यालयले चासो नदिँदा विद्यार्थी मारमा परेको छात्र रमेश बुढाको गुनासो छ। तातोपानी–४, ५ र ६ मा विद्यालय लक्षित शैक्षिक कचहरी दोस्रो शृङ्खला यही वैशाख १८ गते दुर्गा माद्यमिक विद्यालयमा हुने छ।

भेरिखोलाका विद्यालय लक्षित शैक्षिक बहस तातोपानी–७ पातरसाँघुमा यही वैशाख २० गते हुने तातोपानी गाउँपालिकाले जनाएको छ। पातरसाँघुमा तातोपानी–७ र ८ का विद्यालयका समस्या र सम्भावनाबारे चर्चा गरिनेछ ।