आन्दोलन गर्ने शिक्षकको तलब कट्टा गर्ने नगरपालिकाको चेतावनी

बर्दिबास, भदौ १४ गते । आन्दोलनको नाममा धर्ना हडताल गर्ने र विद्यालयको पठनपाठनमा बाधा पु¥याउने शिक्षकमाथि मनरासिसवा नगरपालिकाले कारवाहीको चेतावनी दिएको छ । नगरप्रमुख मोहन पाण्डेयले विद्यालयमा हाजिरी गरी आन्दोलनमा सहभागी हुने शिक्षकहरूको तलब कट्टा गर्ने चेतावनी दिनुभएको हो ।

नेपाल शिक्षक महासंघमा आवद्ध सामुदायिक विद्यालयका शिक्षकहरुले शुक्रबार विद्यालयमा हाजिरी लगत्तै नगर कार्यालयको परिसरमा धर्ना बसेपछि नगर प्रमुख पाण्डेयले यस्तो चेतावनी दिनुभएको हो ।

उहाँले विद्यालयमा आएर हाजिरी गर्ने तर कक्षामा नपढाई आन्दोलनमा सहभागी हुने कार्यलाई विद्यार्थीको भविष्यसँग खेलबाड भएको टिप्पणी गर्दै त्यस्ता शिक्षकको हाजिरी रोक्का गरी तलबसमेत कट्टा गरिने बताउनुभयो ।

उहाँले भन्नुभयो, ‘‘हाजिरी गरेपछि विद्यालयमा पढाउनै पर्छ । आन्दोलनमा जाने हो भने बिदा लिनु पर्छ । अन्यथा गयल गरी तलव कट्टा गरिने छ ।’’  तथापि आन्दोलनरत शिक्षकहरूसँग वार्ता र समाधानको बाटो भने खुला रहेको पनि पाण्डेले बताउनु भयो ।

नगरप्रमुखको चेतावनी प्रति आन्दोलनरत शिक्षकले भने संयमित प्रतिकृया दिएका छन् । दुर्गा मावि मनराका प्रध्यानाध्यापक तथा शिक्षक मञ्चका राष्ट्रिय अध्यक्ष कुमुद सिंहले राष्ट्रि शिक्षक महासंघको आह्वान सुरु भएको यो आन्दोलन केन्द्रीय सेड्युल अनुसार अघि बढने बताउनुभयो ।

प्रध्यानाध्यापक सिंहले भन्नुभयो, ‘‘नगरप्रमुखको भनाईप्रति हाम्रो कुनै आपत्ति छैन । आन्दोलन र बिदाबारे नगरपालिकासँग सहमतिमा अघि बढन सकिन्छ । यसअघिको १४ दिने आन्दोनमा पनि नगरप्रमुखको सहमतिमै वर्षे बिदाबाट पठनपाठन मिलाइएको थियो । अहिले पनि हामीसँग ५० दिन बिदा बाँकी छ ।’’

शिक्षकले सुरु गरेको धर्ना आन्दोलनले नगर क्षेत्रका २७ सामुदायीक विधालयका १३ हजार सात सय विद्यार्थीको पठनपाठनमा बाधा पुग्ने भएपछि नगरपालिका गम्भीर भएको जनाइएको छ । मनरा सिसवा नपामा २५० सामुदायीक शिक्षक कार्यरत छन् ।