एमाले बौद्धिक परिषद् पार्टी केन्द्रीय कमिटी विरूद्द कार्य गर्दै , केन्द्रीय कमिटी निर्णयलाई दिए चुनौती

काठमाडौं । नेकपा (एमाले)को केन्द्रीय कमिटीले विधान महाधिवेशनबारे निर्णय गरिसकेको छ । पार्टीको जनवर्गीय सङ्गठन नेपाल बौद्धिक परिषद् भने केन्द्रीय कमिटीको निर्णय विपरीत आफ्नै शैलीमा सर्वेक्षणमार्फत राय सङ्कलनमा जुटेको छ ।

पार्टीको अन्तरपार्टी निर्देशनलाई चुनौती दिँदै परिषद्ले ‘सर्वेक्षण’ मात्र नभई एमालेभित्र नीति निर्माण प्रक्रियाप्रति उठेको प्रश्न र सङ्गठनभित्रको बहसलाई पनि उजागर गरिरहेको बताइएको छ ।
भदौ २० देखि २२ गतेसम्म काठमाडौंमा हुने दोस्रो विधान महाधिवेशनलाई पार्टी नेतृत्वले पार्टीको भविष्य निर्माण गर्ने प्रमुख राजनीतिक मञ्चका रूपमा व्याख्या गर्दै आएको छ ।
प्रचार विभाग प्रमुख राजेन्द्र गौतमका अनुसार विधान महाधिवेशनमा राजनीतिक प्रतिवेदन, साङ्गठनिक प्रतिवेदन, विधान संशोधन प्रस्ताव र केन्द्रीय निकायका रुपमा रहेका चार सल्लाहकार परिषद् तथा तीन आयोगका प्रतिवेदनमाथि छलफल हुनेछन् ।

प्रधानमन्त्री समेत रहेका अध्यक्ष केपी शर्मा ओलीले राजनीतिक प्रतिवेदन, उपाध्यक्ष तथा अर्थमन्त्री विष्णुप्रसाद पौडेलले विधान संशोधन प्रतिवेदन, महासचिव शंकर पोखरेलले विधान महाधिवेशनमा साङ्गठनिक प्रतिवेदन प्रस्तुत गर्ने एमाले श्राेतले बताएको छ । विधान महाधिवेशनमा प्रस्तुत हुने विधान संशोधन प्रस्तावका लागि एमालेले सचिवालय, पोलिटब्युरो र केन्द्रीय कमिटीमा विस्तृत छलफल गरिसकेको सन्दर्भमा पार्टीको जनवर्गीय संगठन बाैद्विक परिषद् भने पार्टीलाई कसरी अगाडि बढाउने भन्दै छुट्टै सर्वेक्षण गर्न थालेको छ ।
थनननन

पदाधिकारीका लागि ७० वर्षे उमेर सीमा, कार्यकारी पदमा दुई कार्यकालको सीमा र पूर्वराष्ट्रपतिको पार्टी सदस्यताको विषयमा केन्द्रीय कमिटीले निर्णय गरिसकेकाले यस विषयमा बहस नगर्ने पार्टीको निर्देशन छ ।
पार्टीले जारी गरेको निर्देशन विपरीत परिषद्ले आफ्नो सर्वेक्षण केन्द्रमा राख्दै राय सङ्कलन सुरु गरेको छ । यस कदमले पार्टीभित्र समानान्तर बहस मात्र होइन, सङ्गठनात्मक अनुशासन र आन्तरिक लोकतन्त्रबीचको गहिरो द्वन्द्वलाई सतहमा ल्याइदिएको छ ।

परिषद्ले सर्वेक्षणमार्फत् सोधिएका प्रश्नहरू समेत अहिले राजनीतिक वृत्तमा चासोको केन्द्र बनेका छन् ।
परिषद्ले सर्वेक्षणमा सोधेका प्रश्न यस्ता छन्-

– पार्टी परित्याग गरेका कुनै व्यक्ति पुनः पार्टी प्रवेश गर्दा त्यही पदमा पुनःस्थापना गर्ने प्रचलन रोक्न विधानमै व्यवस्था गर्नुपर्छ भन्ने प्रस्तावमा तपाईंको राय के हो ?

– पदाधिकारीका लागि ७० वर्षे उमेर सीमा राख्ने विषयमा तपाईंको धारणा के हो ?

– कार्यकारी पदमा एउटै व्यक्ति दुई कार्यकालभन्दा बढी बस्न नपाउने व्यवस्था राख्ने प्रस्तावलाई तपाईं समर्थन गर्नुहुन्छ ?
विभिन्न संवैधानिक आयोगका पदाधिकारी भई जिम्मेवारी वहन गरिसकेका व्यक्तिहरू पुनः पार्टी जिम्मेवारीमा सक्रिय हुने व्यवस्थाबारे तपाईंको दृष्टिकोण के हो ?

– नेकपा (एमाले)को मार्गदर्शक सिद्धान्त ‘जनताको बहुदलीय जनवाद (जबज)’ बारे आजको सन्दर्भमा तपाईंको राय के छ ?

– हालको विधान अनुसार पार्टीको केन्द्रीय कमिटी सदस्य ३०१ रहेको छ । यसबारे तपाईंको राय के छ ?
परिषद्ले यी लगायत १२ वटा प्रश्न राखेर सर्वेक्षण सुरु गरेको छ । जुन पार्टी अन्तरपार्टी निर्देशन विपरीत छन् ।

परिषद् अध्यक्ष गजेन्द्र थपलिया विधान महाधिवेशनलाई व्यवस्थित बनाउनै सर्वेक्षण सुरु गरेको दाबी गर्छन् । विधान महाधिवेशनमा बहस गर्न पाउनुपर्ने भन्दै थपलियाले सर्वसाधारणलाई समेत लक्षित गरी सर्वेक्षण सुरु गरिएको उनको भनाइ छ ।