एसईईमा एनजी आएका विद्यार्थीले पनि प्राविधिक तालिम लिन पाउँछन्: मन्त्री भट्टराई

काठमाडौं । शिक्षा, विज्ञान तथा प्रविधिमन्त्री विद्या भट्टराईले एसईईमा एनजी ल्याउने विद्यार्थीहरूलाई प्राविधिक तालिम दिने योजना ल्याउन लागेको बताएकी छिन् । बिहीबार प्रतिनिधिसभा बैठकमा बोल्दै शिक्षामन्त्री भट्टराईले विद्यार्थीहरूलाई रोजगारमूलक दक्षता प्रदान गर्नेगरी यस्तो योजना कार्यान्वयनमा ल्याउन लागेको सुनाइन् ।

मन्त्री भट्टराईका अनुसार प्राविधिक शिक्षा तथा व्यावसायिक परिषद् (सीटीईभीटी)ले एसईईको पूरक परीक्षामा समेत एनजी ल्याउने विद्यार्थीहरूका लागि छोटो अवधिका सीपमूलक तालिमको प्याकेजहरू निर्माण गर्ने योजना बनाएको छ । यस पहलले विद्यार्थीहरूलाई प्राविधिक तालिमको अवसर दिनुका साथै उनीहरूको भविष्यलाई उज्ज्वल बनाउन सहयोग पुर्‍याउने उनको विश्वास छ ।

सरकारले यस वर्षदेखि करिअर काउन्सिलिङ कार्यक्रम पनि सञ्चालन गरेको बताउँदै उनले यसबाट विद्यार्थीलाई करिअर विकासमा मार्गदर्शन गर्न मद्दत मिल्ने उनले सुनाइन् । साथै मन्त्रालयले एसईई र कक्षा १२ को परीक्षामा एनजी ल्याउने विद्यार्थीहरूको सङ्ख्या घटाउन अनलाइन कक्षासहित विभिन्न वैकल्पिक कार्यक्रम सञ्चालन गर्न लागेको उनले बताइन् ।

मन्त्री भट्टराईले कर्णाली प्रदेशमा कक्षा ९ देखि कक्षा १२ सम्मका प्राविधिक धारका विद्यालयहरूमा निःशुल्क प्राविधिक शिक्षा कार्यक्रम सञ्चालन भइरहेको जानकारी दिइन् । तर, विद्यार्थीहरूको अभावका कारण प्राविधिक शिक्षा कार्यक्रमहरूको प्रभावकारिता सीमित रहेको उनले उल्लेख गरिन् ।

“प्राविधिक शिक्षा कार्यक्रम सञ्चालन भएका विद्यालयमा प्राविधिक शिक्षा अहिले पनि निःशुल्क छ । त्यस्ता विद्यालयमा विद्यार्थी भर्ना प्रतिशत ४० प्रतिशतको हारहारीमा छ,” मन्त्री भट्टराईले भनिन्, “एकातिर हामी प्राविधिक शिक्षा माग गर्छौं । अर्कोतिर सञ्चालित विद्यालयमा विद्यार्थीको अभाव छ । विद्यालय तहमा रहेको छात्रवृत्ति कार्यक्रमको अतिरिक्त प्राविधिक शिक्षा तथा व्यावसायिक तालिम परिषद्का आङ्गिक शिक्षाले र सम्बन्धन प्राप्त संस्थाहरूमा छात्रवृत्ति कोटा समेत उपलब्ध छ ।”