नेपाललाई पाकिस्तानको ३ सय ४३ रनको लक्ष्य

एसिया कप २०२३ मा नेपाललाई पाकिस्तानले ३ सय ४३  रनको  विशाल लक्ष्य दिएको छ। पाकिस्तानका कप्तान बाबर आजम र इफ्तिखार अहमदको आक्रामक शतकमा पाकिस्तानले उक्त योगफल बनाएको हो।

पाकिस्तानले पूरा ५० ओभर खेल्दै ६ विकेटको क्षतिमा ३४२ रन बनाएको हो। ५.३ ओभरको समाप्तिमा पाकिस्तानले २१ रन बनाएर दुई विकेट गुमाएको अवस्थामा क्रिजमा आएका कप्तान आजमले क्रिज सम्हाल्दै पाकिस्तानलाई बलियो स्कोरतिर अघि बढाएका हुन्।

आजमले शतक बनाउने क्रममा १०९ बल शतक पूरा गरेका हुन्। उनले समग्रमा १३१ बल खेल्दै १५१ रन बनाए। यसैगरी इफ्तिखार अहमदले नटआउट १०९ रन बनाए।

ओपनरद्वय फाखर जामनले २० बलमा जम्मा १४  रन बनाएर बाहिरिए। करण केसीले फाखर जमानलाई आसिफ शेखबाट क्याचआउट गराएका हुन् भने अर्का इमाम-उल-हक जम्मा ५ रन बनाएर रनआउट भए।

यसैगरी सन्दीप लामिछानेले आघा सलमानलाई ५ रनमा क्याचआउट गराए। त्यसपछि नेपाललाई विकेटका लागि अन्तिम ओभर कुर्नुपर्‍यो। अन्तिम ओभरमा सोमपाल कामीले कप्तान आजम र साधव खानलाई आउट गरेका हुन्।