मेयर्स फोरमको निर्णय : सिंहदरबार पुनर्निर्माणका लागि ५ करोड सहयोग

काठमाडौँ । काठमाडौँ उपत्यका मेयर्स फोरमले जेनजी आन्दोलनको क्रममा क्षतिग्रस्त संरचनाको पुनर्निर्माण र सुरक्षा व्यवस्था सुदृढ पार्नका लागि तत्काल ६ करोडको सहयोग घोषणा गरेको छ । आज ललितपुर महानगरपालिकामा मेयर्स फोरमले पत्रकार सम्मेलन गर्दै सहयोग घोषणा गरेको हो ।

हिजो गोदावरी नगरपालिकामा बसेको फोरमको १२ औँ बैठकले आन्दोलनले आगलागी भएको सिंहदरबार भवनको पुनर्निर्माण गर्न ५ करोड,  सीसीटिभी प्रणाली व्यवस्थापन गर्न  उपत्यका प्रहरी कार्यालयलाई १ करोड सहयोग गर्ने निर्णय गरेको थियो ।

तोडफोड र आगजनीका कारण क्षतिग्रस्त भएका उपत्यकाका अन्य नगरपालिकालाई समेत सेवा प्रवाहमा सहजीकरणका लागि क्षति विवरणका आधारमा थप सहयोग गर्ने फोरमका अध्यक्ष तथा ललितपुर महानगरपालिकाको प्रमुख चिरीबाबू महर्जनले बताए । तत्काल गरिने सहयोग मेयर्स फोरमको कोष भएको पैसाबाट गर्ने भएको हो ।

अराजकताको निन्दा र कारबाहीको माग

काठमाडौँ उपत्यका मेयर्स फोरमले भदौ २३ र २४ गते भएको जेनजी आन्दोलनमा भएको तोडफोड, आगजनीप्रति गम्भीर आपत्ति व्यक्त गर्दै घोर निन्दा गरेको छ । फोरमले आन्दोलनका नाममा सिंहदरबार, सर्वोच्च अदालत, महानगरपालिकाका भवन, सुरक्षा निकायका कार्यालय लगायतका संवेदनशील सार्वजनिक सम्पत्तिमाथि आक्रमण, तोडफोड र आगजनी भएकोमा कडा शब्दमा निन्दा गरेको हो ।

‘अराजक र तोडफोडको योजनाले नेपालको संविधान, लोकतन्त्रको संरक्षण र सुशासनयुक्त कार्यमा बाधा पुर्याई नेपालको अन्तर्राष्ट्रिय जगत्मा समेत बदनामी र बेइज्जत भइरहेको छ,’ पत्रकार सम्मेलनमा प्रमुख महर्जनले भने । उपत्यकाका १८ वटा नगरपालिकाका प्रमुख तथा उपप्रमुखको प्रतिनिधित्व सहित मेयर्स फोरम गठन भएको थियो ।