शिक्षामा उत्कृष्ट अभ्यासहरुलागि आम आदमी पार्टीको दिल्ली सरकारसंग समन्वय गर्ने – ई प्रबिन काफ्ले

भरतपुर महानगर प्रमुखको लागि विवेकशील साझा पार्टीबाट उमेदवारी दिनु भएका ई प्रबिन काफ्लेले आफ्नो संकल्प पत्रमा निशुल्क तथा गुणस्तरीय सार्वजनिक शिक्षालाई प्राथमिकताका साथ राख्नु हुने भएको छ ।

उहाँका अनुसार भरतपुर महानगरमा शिक्षाको बजेट ब्यापक रुपमा बढाइने छ।  बढेको बजेटले महानगर अन्तर्गत बिद्यालयको भौतिक संरचनाको स्तरोन्नति गरिने छ।  विरेन्द्र बहुमुखी क्याम्पस, सप्तगण्डकी बहुमुखी क्याम्पस, लगायत सम्पूर्ण सामुदायिक क्याम्पसहरूको पूर्वाधार विकास लगायत शैक्षिक विकासका लागि विशेष महत्वका साथ केन्द्र र प्रदेश सरकारसंग पहल गरिनेछ।

उहाँ  प्रमुख भएको खण्डमा स्थानीय पाठ्यक्रम अन्तर्गत विद्यालयहरुमा “Happiness Class ” संचालन गरिने छ जसमा व्यक्तिगत स्वच्छता, प्रकृति प्रेम, योग, ध्यान,धैर्यता, विनम्रता,अनुशासन, Emotional Intelligence , Inner Engineering आदि सिकाइने काफ्ले बताउनु हुन्छ।

काफ्लेका अनुसार विवेकशील साझा पार्टीले नैतिक शिक्षा, खेलकुद, गीत–संगीत, चित्रकला आदिमा विशेष जोड दिइनेछ । संग-संगै रोजगारमूलक तथा उद्यमशील बन्ने गरी शिक्षालाई व्यावहारिक, रोजगारीमूलक बनाउन “Entrepreneurship Class” पनि समावेश गरिने छ।  शिक्षामा उत्कृष्ट अभ्यासहरु बाट सिक्ने, सोका लागि आम आदमी पार्टीको दिल्ली सरकारसंग समन्वय गरिने छ।

सामुदायिक विद्यालयका प्रधानाध्यापक तथा शिक्षकहरूलाई कार्यदक्षता र कार्यसम्पादनका आधारमा पुरस्कृत हुने गरी शिक्षा सुधारका लागि उत्प्रेरित गरिनेछ । वैदेशिक ट्रेनिंगको व्यवस्था गरिने छ। साथै विद्यालयहरूमा प्राविधिक शिक्षालाई प्राथमिकता दिइनेछ र नयाँ प्राविधिक विषयहरू थप गरिने छ ।

महानगर भित्रका सबै बिद्यालयमा जैविक कृषिको तरिका बिद्यार्थीलाइ सिकाइने तथा  सामुदायिक विद्यालयहरूमा बालमैत्री मन्टेसरी विधिबाट अध्यापन गराउने व्यवस्था मिलाइने छ र   समाजमा विकृतिका रूपमा रहेको लागुपदार्थ तथा दुर्व्यसनीको समस्या न्यूनीकरण गर्न विभिन्न युवा क्लबहरूसँग समन्वय गरी विभिन्न किसिमका रचनात्मक कार्यक्रमहरू संचालनमा ल्याइने छ । विद्यालयमा खेलकुद विकास गरी खेल शहरको रूपमा अगाडी बढाईने ई काफ्लेले भि ग्रुप मिडिया नेटवर्कलाई जानकारी दिनु भयो  ।