तीन हजार शिक्षकको अस्थायी दरबन्दीको स्थायी गर्न मन्त्रिपरिषदमा प्रस्ताब

वैशाख ११, काठमाडाैं । शिक्षा, विज्ञान तथा प्रविधि मन्त्रालयले तीन हजार शिक्षकको अस्थायी दरबन्दीको प्रस्ताव मन्त्रिपरिषदमा पठाएको छ ।

शिक्षामन्त्री देवेन्द्र पौडेलले सञ्चारकर्मीसँग बोल्दै अंग्रेजी, विज्ञान र गणित शिक्षक अभाव भएको र विषयगत शिक्षक नहुँदा समस्या परेको बताए ।

‘शिक्षक सेवा आयोगले योग्य शिक्षक छनोट गरिरहेको छ’ मन्त्री पौडेलले भने, ‘नयाँ शिक्षक नआउञ्जेलका लागि शिक्षक व्यवस्थापन गर्न तीन हजार शिक्षकको प्रस्ताव मन्त्रिपरिषदमा लगिएको छ ।’

मन्त्री पौडेलले आर्थिक वर्ष २०७९/८० को बजेटमार्फत शिक्षामा तीन प्रकारको सुधार गर्न खोजिएको पनि बताए । ‘कानुनी सुधार, शिक्षण सिकाइमा सुधार र पूर्वाधारमा सुधार गर्न चाहेका छौँ,’ मन्त्री पौडेलले भने ।