सहमती सँगै आन्दोलन रोकिएको शिक्षक महासङ्घको घोषणा (५१ बुँदा सहित)

फागुन १५, काठमाडौं ।  नेपाल शिक्षक महासङ्ले सरकारसँग भएको ५१ बुँदा सहमती भएसँगै आन्दोलन रोकिएको जनाएको छ । २०७८ बैशाख २० बाट प्रारम्भ भएको शिक्षक आन्दोलन सहमती भएकै मितिबाट रोकिएको जनाएको हो ।

महासङ्घले आज पत्रकार सम्मेलन गरेर शिक्षामा लगानी बृद्घि, अनिवार्य तथा निशुल्क शिक्षाको प्रबन्धको कार्यान्वयन , शिक्षाको गुणस्तर विकास देखि शिक्षक कर्मचारीको पेसागत मागहरुको सम्बोधनका थुुप्रै विषयहरु सहमतीमा समेटिएको जानकारी दिएको छ ।

माग पुरा गर्नका लागि विभिन्न चरणका आन्दोलन गर्न परेको र पाँचौं चरणको आन्दोलन शुरु हुनु भन्दा अघि सरकारबाट वार्ताका लागि पत्राचार भएपछि वार्ता समिति निर्माण गरी २०७८ कार्तिक २८ गतेबाट वार्तामा सहभागी भयौं विज्ञप्तिमा भनिएको छ ।

साथै वार्ता कार्यदलका प्रतिनिधिहरु एकपछि अर्को गर्दै कोभिड सङ्क्रमित भई आइसोलेसनमा बस्नु परेका कारण वार्ता प्रकिया केही लामो हुन गए पनि धेरै चरण वसाइ पछि २०७८ फाल्गुण ०९ गते नेपाल शिक्षक महासङ्घ र नेपाल सरकार शिक्षा विज्ञान तथा प्रविधि मन्त्रालय बीच ५१ बुँदामा सहमती भई हस्ताक्षर भएको जनाएको हो ।

पेसागत आन्दोलन एक पटकको एउटै प्रयत्नमा पूरा हुने आन्दोलन नभएको बताउँदै महासङ्घले पेश गरेका मागहरु मध्ये कतिपय विषयहरु अझै सम्बोधन हुन बाँकी रहेको जनाएको छ । सहमतीमा नसमेटिएका मागहरुको सम्बोधनका लागि नेपाल शिक्षक महासङ्घ सदैव सजग,सक्रिय र प्रयत्नशिल रहने अध्यक्ष कमला तुलाधरले बताईन ।

महासङ्घका महासचिव लक्ष्मी किशोर सुवेदीले सहमतीका बुुुँदहरु अविलम्व कार्यान्वयन गरी अघि बढ्न तथा शीघ्रताशीघ्र शिक्षा ऐन जारी गर्न सरकार समक्ष आग्रह गरेको बताए । यसका लागि सदैव कडा पक्षीकरण गरीरहने सुवेदीको भनाई छ ।

महासङ्घले २०७८ वैशाख २० गतेबाट कोभिड सङ्क्रमणका कारण सामाजिक सञ्जाल मार्फत् चरणबद्घ आन्दोलन शुरु गरेको थियो । आन्दोलन क्रमशः धर्ना, घेराउ, रिले अनसन हुँदै पाँचौं चरणमा काठमाडौं केन्द्रित निर्णायक सडक आन्दोलन तर्फ अघि बढ्दै गर्दा सरकारले वार्तामा बोलाए पछि तत्काल स्थगित गरी वार्तामा बसेको थियो ।