स्ववियु निर्वाचनको विषयलाई लिएर भैरहवा बहुमुखी क्याम्पसमा तोडफोड

बुटवल। रुपन्देहीको भैरहवा बहुमुखी क्याम्पसमा विद्यार्थीहरूले स्ववियू निर्वाचनको विषयलाई लिएर तोडफोड गरेका छन् । स्ववियु निर्वाचनका लागि सङ्गठन दर्ताका लागि एमालेनिकट अनेरास्ववियु लगायतका विद्यार्थी सङ्गठनहरू क्याम्पस प्रवेश गरेपछि समाजवादी विद्यार्थी युनियन, समाजवादी विद्यार्थी युनियन नेपाल, जनमत विद्यार्थी सङ्घ, राष्ट्रिय प्रजातान्त्रिक विद्यार्थी युनियन र स्वतन्त्र मधेस विद्यार्थी युनियनले कुर्सी तोडफोड गरेका हुन् ।

निर्वाचनको विषयलाई लिएर तोडफोड भएको अनेरास्ववियु क्याम्पस अध्यक्ष विवेक भण्डारीले जानकारी दिए ।  विभिन्न माग राखेर ती विद्यार्थी सङ्गठनहरूले निर्वाचन आयोगको कार्यकक्षमा आइतबार तालाबन्दी गरेका थिए ।

उनीहरूले क्याम्पसमा प्रथम वर्षको भर्ना खोल्न माग गर्दै आएका थिए ।  माग बेवास्ता गर्दै निर्वाचनको प्रक्रियामा गएपछि ती विद्यार्थी सङ्गठनहरूले असन्तुष्टि जनाउँदै आएका थिए । निर्वाचन तालिका अनुसार निर्वाचन आयोगले आफ्नो प्रक्रिया अगाडि बढाउनका निम्ति सोमबार ५ विद्यार्थी सङ्गठनसँग बैठक बसिरहेको थियो । त्यसैबेला नेकपा एमालेको भातृ सङ्गठन अनेरास्ववियुले सङ्गठन दर्ता गरी पाउ भन्दै बैठक हलमा प्रवेश गरेको थियो । अनेरास्ववियुका कार्यकर्ता प्रवेश गरेलगत्तै विवाद निम्तिएको थियो ।

त्यसपछि विरोधमा उत्रिएका पाँच विद्यार्थी सङ्गठनले तोडफोड गरेका हुन् । समाजवादी विद्यार्थी युनियनका इकाई इन्चार्ज इरफान अलीले बैठक कक्षमा अनेरास्ववियुका कार्यकर्ता प्रवेश गरेर होहल्ला गरेपछि पाँच विद्यार्थी सङ्गठनका सदस्यहरू आक्रोशित भएर तोडफोडमा उत्रिएको जानकारी दिए ।

सो घटनालगत्तै स्वतन्त्र विद्यार्थी युनियनको निर्वाचन कार्यक्रम अर्को सूचना प्रकाशित नहुँदा सम्मका लागि स्थगित गरिएको निर्वाचन अधिकृत गणेशप्रसाद पाण्डेयले बताए ।