एलन मस्क बने ४०० अर्ब डलर सम्पत्ति कमाउने इतिहासकै पहिलो व्यक्ति

काठमाडौं । एलन मस्क इतिहासमै ४०० अर्ब डलरभन्दा बढी सम्पत्ति कमाउने पहिलो व्यक्ति बनेका छन् । ब्लुमबर्ग बिलेनियर इन्डेक्स अनुसार, अहिले उनको कूल सम्पत्ति करिब ४४० अर्ब डलर (३४५ अर्ब पाउन्ड) पुगेको छ । यो माइक्रोसफ्टका संस्थापक बिल गेट्स र अमेजनका जेफ बेजोस दुवैको कूल सम्पत्ति भन्दा पनि धेरै हो ।

डोनल्ड ट्रम्पले अमेरिकाको राष्ट्रपति चुनाव जितेपछि मस्कको सम्पत्तिमा उल्लेखनीय वृद्धि भएको छ । चुनावी अभियानका क्रममा मस्कले ट्रम्पलाई राजनीतिक समर्थनका साथै चन्दा समेत दिएका थिए । ट्रम्पले आउँदो जनवरीमा सत्ता सम्हालेपछि मस्कको प्रभाव झन् बढ्ने अपेक्षा गरिएको छ।

मस्क टेस्ला कम्पनीका प्रमुख कार्यकारी अधिकृत (सीईओ) हुन् । यो कम्पनीको शेयर ट्रम्पको जीतपछि करिब ६५ प्रतिशतले बढेको छ ।  ट्रम्पले अन्य प्रतिस्पर्धी कम्पनीलाई उपलब्ध गराइएका कर प्रोत्साहन (Tax Credit) हटाउने अनुमानले टेस्लाको शेयरमा उल्लेखनीय वृद्धि भएको बताइन्छ ।

बुधबार टेस्लाको शेयर मूल्य पुनः रेकर्ड ब्रेकिङ स्तरमा वृद्धि भएर ४२० अमेरिकी डल पुगेको छ । उक्त कम्पनीमा रहेको मस्कको १२.८ प्रतिशत शेयरको मूल्य मात्र करिब १७२ अर्ब बराबर छ ।

यसै साता, लगानीकर्ताले मस्कको रकेट तथा भू-उपग्रह कम्पनी स्पेसएक्समा १.२५ अर्ब अमेरिकी डलरको शेयर किनेका छन् । यसले स्पेसएक्सलाई ३५० अर्ब अमेरिकी डलरको मूल्यांकनसहित विश्वकै सबैभन्दा मूल्यवान स्टार्टअप बनाएको छ ।

दुई वर्षअघि मस्कको सम्पत्ति १३७ अर्बमा झरेको थियो । तर, हालको वृद्धिले उनलाई विश्वकै सबैभन्दा धनी व्यक्ति बनाएको छ। मस्कको सम्पत्तिको मुख्य स्रोत टेस्ला, स्पेसएक्स र अन्य प्रविधि कम्पनीहरू हुन् । उनले आर्थिक र सरकारी क्षेत्रमा पनि प्रभावशाली भूमिका खेल्न सक्ने अनुमान गरिएको छ ।