गोकर्णेश्वर स्थानीय पाठ्यक्रममा आधारित स्थलगत अवलोकन गराउने देशकै पहिलो नगरपालिका

काठमाडौं । गोकर्णेश्वर नगरपालिकाका नगर प्रमुख दिपक रिसालले स्थलगत अवलोकन कार्यक्रम शुभारम्भ गर्ने गोकर्णेश्वर नगरपालिका देशमै पहिलो नगरपालिका भएको बताउनु भएको छ । शुक्रवार कार्यक्रमको शुभारम्भ गर्नु हुँदै नगर प्रमुख दिपक रिसालले स्थानीय पाठ्यक्रम बनाएर लागू गर्ने देशमै पहिलो नगरपालिका बने जस्तै गोकर्णेश्वर नगरपालिका स्थलगत अवलोकन कार्यक्रम लागू गर्ने पनि नेपालकै पहिलो नगरपालिका भएको दावि गर्नु भयो ।

गोकर्णेश्वर नगरपालिकाले आज शुभारम्भ गरेको स्थानीय पाठ्यक्रमको प्रभावकारी कार्यान्वयनको लागि स्थलगत अवलोकन कार्यक्रमलाई सम्बोधन गर्नु हुँदै मेयर रिसालले सो दावि गर्नु भएको हो ।

आज नगरपालिकाको शिक्षा, युवा तथा खेलकुद शाखाले गोकर्णेश्वर महादेव मन्दिर प्रांगणमा एक कार्यक्रम आयोजना गरि स्थलगत अवलोकन कार्यक्रमको शुभारम्भ गरेको छ । कार्यक्रमको शुभारम्भ नगर प्रमुख दिपक रिसालले गर्नु भयो ।

गोकर्णेश्वरले २०७६ सालमा नेपालमै पहिलो पटक स्थानीय पाठ्यपुस्तक तयार गरेको थियो । गोकर्णेश्वरले कक्षा १ देखि ८ सम्मका स्थानीय पाठ्यपुस्तक तयार गरि लागू गरेको छ भनें कक्षा १ को डिजिटल पाठ्यपुस्तक समेत तयार गरि नगरपालिकाका सबै सामुहिक विद्यालयमा लागू गरिसकेको युवा तथा खेलकुद उपशाखा प्रमुख राम नारायण साहले जानकारी दिनु भयो ।

आज कक्षा ८ का विद्यार्थीहरूलाई गोकर्णेश्वर मन्दिरको बारेमा पाठ्यपुस्तकमा पढाइने मन्दिर क्षेत्रको स्थलगत अवलोकन गराईएको हो । आज १४ वटा सामुदायिक विद्यालयका विद्यार्थीहरु सहभागि रहेका साहले बताउनु भयो ।

आज विद्यार्थीहरूलाई मन्दिरको ऐतिहासिकता तथा धार्मिक, सांस्कृतिक महत्वबारे गोकर्णेश्वर महादेव मन्दिर संरक्षण समितिका सचिव इश्वर पाण्डेले जानकारी दिनु भएको थियो । स्थलगत अवलोकन कार्यक्रम शुभारम्भको अवसरमा १४ वटै सामुदायिक विद्यालयका प्रधानाध्यापक तथा विषय शिक्षकको समेत उपस्थिती रहेको साहले बताउनु भयो ।