अखिल क्रान्तिकारीमा प्रचण्डपक्ष र शर्मा पक्षबीच कडा प्रतिस्पर्धा

काठमाडौँ । माओवादी केन्द्रको विद्यार्थी संगठन अखिल क्रान्तिकारीको नेतृत्वमा संस्थापन र उपमहासचिव जनार्दन शर्मा पक्षधर उम्मेदवारबीच प्रतिस्पर्धा हुने भएको छ । माओवादी अध्यक्ष पुष्पकमल दाहालले विद्यार्थी नेतालाई गुटबन्दी नगर्न निर्देशन दिए पनि गुटगत प्रतिस्पर्धा हुन लागेको हो ।

संस्थापन पक्षले बुटवलको सुप्रिम सहकारीको रकम हिनामिना गरेको आरोग लागेका दीपेश पुनलाई अखिल क्रान्तिकारीको अध्यक्ष बनाउन चाहेको छ । संस्थापन पक्षबाट लुम्बिनीका पूर्वमुख्यमन्त्री जोखबहादुर महराका छोरा तुकमानले पनि अध्यक्षमा दाबी गरेका छन् । पुन र महरा एउटै जिल्ला रोल्पाका हुन् । दुवै उपमहासचिव वर्षमान पुननिकट पनि छन् । शर्मा पक्षबाट मदन भुल, क्षितिज सापकोटा, नारायण खनाल अध्यक्षका आकांक्षी छन् । उनीहरूमध्ये एक जनालाई मात्र अघि सार्ने गरी शर्मा पक्षले गृहकार्य गरिरहेको छ ।

निवर्तमान अध्यक्ष पञ्चा सिंहको नेतृत्वविरुद्ध समानान्तर समिति चलाएका पवन कार्कीले पनि अध्यक्षमा आकांक्षा राखेका छन् । कार्की वरिष्ठ उपाध्यक्ष नारायणकाजी श्रेष्ठ पक्षका हुन् । महासचिव देव गुरुङ, पम्फा भुसालनिकट रहेका नरेश रेग्मी पनि अध्यक्षको आकांक्षी हुन् । अच्युत भट्ट, केशव रावल, जीपी मैनाली, इन्द्र भुसाल, प्रवीणा अधिकारी पनि अध्यक्षका आकांक्षी हुन् । भट्ट, रावल र अधिकारीले भने कुनै पक्षमा नलागी साझा उम्मेदवारका रूपमा प्रतिस्पर्धा गर्न लागेको बताएका छन् । ‘संगठनमा गुटबन्दी अन्त्य गरी स्वतन्त्र प्रतिस्पर्धा हुनुपर्छ,’ रावलले भने । दन्तचिकित्सक भट्टले संगठनलाई सशक्त नेतृत्व दिन खुला प्रतिस्पर्धा हुनुपर्ने बताए । अहिले आकांक्षी धेरै देखिए पनि नेतृत्वका लागि मुख्यगरी संस्थापन र शर्मा पक्षबीच प्रतिस्पर्धा हुने अखिलका नेताहरू बताउँछन् ।

संस्थापन पक्षबाट महासचिवमा सुधीन पौडेल, सञ्जय कालधन, प्रशून कार्कीलगायत आकांक्षी देखिएका छन् भने शर्मा पक्षबाट हेमन्त राई, नारायण बडाल, रोशन थापा मगर, मदन लिम्बू, समीर पाण्डे आकांक्षी हुन् । ‘दुवै पक्ष अध्यक्ष, उपाध्यक्ष र महासचिवसम्म प्यानल बनाउने तयारीमा छन्,’ क्रान्तिकारीका एक पदाधिकारीले भने । गत स्थायी समिति बैठकमा उपमहासचिव शर्माले लिखित मत राख्दै अध्यक्ष दाहालले नेतृत्व हस्तान्तरण गर्नुपर्ने प्रस्ताव राखेका थिए । त्यसपछि सुरु भएको अन्तरसंघर्ष विद्यार्थी संगठनमा पनि देखिएको हो ।

अखिल क्रान्तिकारीको २०७४ भदौमा भएको २२औं राष्ट्रिय सम्मेलनमा विवाद भएका कारण हलबाट नेतृत्व चयन हुन सकेको थिएन । त्यसपछि पार्टी अध्यक्ष दाहालले पञ्चा सिंहलाई अध्यक्ष घोषणा गरेका थिए । लामो विवादबीच दीपेश पुनलाई महासचिव बनाइएको थियो । २१औं राष्ट्रिय राष्ट्रिय सम्मेलनमा माओवादी नेताहरू वर्षमान पुन र जनार्दन शर्मा पक्षधरबीच प्रतिस्पर्धा भएको थियो । पुनले रञ्जित तामाङ र शर्माले भाइ अनिललाई उम्मेदवार बनाएका थिए । त्यस सम्मेलनबाट तामाङ निर्वाचित भएका थिए । त्यो सम्मेलनबाटै दुई नेताबीच द्वन्द्व सुरु भएको थियो ।