शिक्षामन्त्रीले गरिन् पदभार ग्रहण, विद्यार्थी खाजालाई स्थानीय उत्पादनसँग जोड्न समिति गठन

काठमाडाैँ- शिक्षा, विज्ञान तथा प्रविधिमन्त्री विद्या भट्टराईले पदभार ग्रहण गरेकी छन्। विद्यार्थीलाई दिइने दिवा खाजालाई स्थानीय उत्पादनसँग जोड्नका लागि अध्ययन गर्न समिति गठन गरेकी छन्।

सोमबार पदभार ग्रहण गर्दै मन्त्री भट्टराईले प्रारम्भिक बालविकासदेखि ५ कक्षासम्मका विद्यार्थीहरूलाई दिइने दिवा खाजा कार्यक्रमलाई स्थानीय कृषि उत्पादनसँग जोड्ने प्रारुप तयार गर्न समिति गठन गर्ने निर्णयमा हस्ताक्षर गरेकी हुन्।

समितिमा शिक्षा मन्त्रालयका साथै कृषि मन्त्रालय, स्वास्थ्य मन्त्रालय र योजना आयोगका प्रतिनिधिहरू सहभागी हुनेछन्। उक्त समितिले स्थानीय कृषि उत्पादनलाई दिवा खाजामा जोड्न राष्ट्रिय प्रारुप तयार गर्नेछ।

कार्यभार सम्हाल्दै मन्त्री भट्टराईले सार्वजनिक शिक्षा प्रतिको आशा र विश्वास बढाउने दायित्व ख्याल गर्ने बताइन्। विद्यालय शिक्षाका समस्यालाई छिटो भन्दा छिटो ऐन निर्माण गरेर समाधान गर्ने आफ्नो प्राथमिकता हुने बताइन्। विद्यालय शिक्षामा गुणस्तरीयता कायम गर्ने र नेपालमै पढेर सक्षम नागरिक हुन्छु भन्ने अवधारणा विद्यार्थीमा विकास गर्ने गरी विश्वविद्यालय शिक्षालाई सुधार गर्ने आफ्नो प्राथमिकता हुने उनले बताइन्।

यस अघि राष्ट्रपति कार्यालय शीतल निवासमा राष्ट्रपति रामचन्द्र पौडेलले एमाले अध्यक्ष केपी ओलीलाई प्रधानमन्त्रीको शपथ खुवाएका थिए। त्यस लगत्तै दुई उपप्रधान सहित मन्त्रीले शपथ खाएका थिए।

प्रधानमन्त्री ओली नेतृत्वको सरकारमा दुई उप प्रधान सहित २१ मन्त्री भएका छन्। प्रधानमन्त्री ओलीको शपथ लगत्तै उपप्रधान तथा मन्त्रीहरूले शपथ लिएका थिए।