चौथो चरणको उज्यालो धनगढी कार्यक्रम : जडान गरिएका स्ट्रिप रोप लाइटको उद्घाटन

धनगढीः मोहना–अत्तरिया ६ लेन सडक खण्डमा जडान गरिएका स्ट्रिप रोप लाइटको उद्घाटन गरिएको छ।

चौथो चरणको ‘उज्यालो धनगढी’ कार्यक्रमअन्तर्गत ६ लेन सडक खण्डमा धनगढी उपमहानगरपालिकाले जडान गरेका स्ट्रिप रोप लाइटको उद्घाटन गरिएको हो।

आइतबार साँझ सुदूरपश्चिम प्रदेश सरकारका भौतिक पूर्वाधार विकासमन्त्री प्रकाशबहादुर देउवाले स्विच दाबेर स्ट्रिप रोप लाइटको उद्घाटन गरेका हुन्।

मन्त्री देउवाले धनगढी शहरलाई उज्यालो बनाएकोमा मेयर, उपमेयरदेखि सबै धनगढी उपमहानगरलाई धन्यवाद दिए। उनले अन्य प्रदेशभन्दा विकसित प्रदेश बनाउनका लागि सुदूरपश्चिम प्रदेश सरकारले काम गरिरहेको बताए। तीनै तहका सरकारबीच समन्वय गरेर विकास निर्माणका काममा अघि बढ्नुपर्ने उनको भनाइ थियो।

उद्घाटन कार्यक्रममा नगर उपप्रमुख कन्दकलाकुमारी रानाले स्ट्रिप रोप लाइट जडानका लागि ३४ लाख ५३ हजारमा ठेक्का सम्झौता भएको जानकारी गराइन्। उनका अनुसार दुई सय ६६ वटा स्ट्रिप रोप लाइट जडान गरिएको छ।

उपमहानगरपालिकाले धनगढी एयरपोर्ट गेट सडक खण्डमा जडान गरिएका सडक बत्तीको पनि मन्त्री देउवाले आइतबार साँझ नै उद्घाटन गरे।

धनगढी एयरपोर्टदेखि ६ लेन सडकसम्मको सडक बत्ती जडानका लागि १० लाख ४९ हजारमा ठेक्का सम्झौता भएको नगर उपप्रमुख रानाले जानकारी दिइन्। उनका अनुसार ५६ वटा पोलमा सडक बत्ती जडान भएको छ।

धनगढी विमानस्थल छिर्दा निकै अँध्यारो हुने भएकाले त्यसलाई उज्यालो बनाउनका लागि उपमहानगरले सडकबत्ती जडान गरेको नगर प्रमुख गोपाल हमालले बताए।