कमलपोखरी नामेट पारी ठमेलको जग्गा हडप्ने यीनीहरुमाथि सीआइबीको अनुसन्धान बढ्ला ? (नामावलीसहित)

शिक्षा संचार

२० माघ २०८०, शनिबार १९:५१

काठमाडौं, २० माघ । देशमा सार्वजनिक जग्गा हडप्ने भूमाफियाको हातमा धमाधम हथगडी लाग्न थालेको छ । ललिता निवास हुँदै बाँसबारी छाला जुत्ता कारखानाको जग्गा हडप्ने प्रहरीको अनुसन्धानमा परे । कतिपय जेल गएका छन् त कतिपय प्रहरी हिरासतमा छन् ।तर, देशमा यस्तो एउटा घटना छ जसका नाइके र मतियारहरु अझै प्रतिष्ठितको पगरी लगाएर खुलेआम हिंडिरहेका छन् । उनीहरुले एउटा गिरोह नै बनाए । ठमेलस्थित हजारौं वर्ष पुरानो कमलपोखरी नामेट पारी छायाँ सेन्टर ठड्याएका छन् । जहाँ पाँचतारे होटल पनि बनाइएको छ ।

प्रधानहरुको आराध्य देव सिंह सार्थबाहु गरुड भगवानलाई कमलको फूल चढाउन निर्माण भएको कमलपोखरी राणा शासनमा हडप्न खोजिएको थियो । तर, नामेट भएको थिएन ।

पछि वीरेन्द्र शाह राजा हुँदा यसको विवाद टुंगो लगाउने उनले आफ्नी सम्धी अम्बिका राणा र प्रधानहरुका तर्फबाट हिरण्यश्वरमान प्रधानलाई डाकेर तत्काललाई कुरा मिलाएका थिए । तर, ऐतिहासिक प्रमाण रहेको कमलपोखरी नामेट भएन । गुठी संस्थानमा यसको प्रमाणहरु सबै फेला परेको छ ।

तर, माफिया शैलीमा पृथ्वीबहादुर पाँडेले शक्ति निकाय सबै मिलाएर पोखरीको जग्गा हडपे । उनलाई वित्तिय क्षेत्रको डन पनि भनिन्छ । उनले जग्गा हडप्ने योजना बुने । प्रभावशाली पदमा रहेका नेता देखि कर्मचारीलाई हातमा लिए । काठमाडौं महानगरपालिकाबाट नक्शा पास गर्न लगाएर छायाँ कम्प्लेक्स ठड्याए । त्यसका लागि जो जस्को साथ लिनुपर्छ उसलाई गोल्डेन शेयर पनि दिए । ज जस्ले छायाँ कम्प्लेक्स बनाउन साथ दिन्छ उसलाई शेयर दिएर व्यवस्थापन दिए । यसकारण उनीहरु सबै सार्वजनिक जग्गा हडप्नेमा मतियार देखिएका छन् ।

यसरी गोल्डेन शेयर लिनेहरुमध्ये कतिले श्रीमती, छोराछोरी या आफन्तका नाममा शेयर राखेका छन् । कतिपयले लगानी पनि गरेका छन् । नेपालपेनले यसरी छायाँदेवी कम्प्लेक्समा लगानी गर्नेहरुको नाम खुलाइसकेको छ ।

छायाँ सेन्टरका नाममा बनेको कम्प्लेक्समा शेयरधनीमध्य व्यापारिक घराना पाँडे परिवारका सदस्यहरुको संख्या उल्लेख्य छ । फ्री प्रेस नेपालले कम्पनि रजिष्ट्रार कार्यालयको स्रोत उल्लेख गरी सार्वजनिक गरेको नामावली र लगानी रकम अनुसार चर्चित व्यापारी पृथ्वी बहादुर पाँडेको ७ करोड ७८ लाख ३४ हजार ६ सय लगानी देखिन्छ ।

यतिसम्मकी अदालतमा मुद्या विचाराधीन रहेकै अवस्थामा छायाँ देवी कम्प्लेक्स पब्लिक लिमिटेडको नाममा आइपीओ खोल्ने प्रक्रिया बढाइएको छ । यसका लागि २१ साउनमा सूचना जारी गरी साधारण सभा डाकियो छ । १० भदौमा डाकिएको साधारणसभाको मुख्य उद्देश्य नै आइपीओ खोल्ने प्रस्ताव पारित गर्नु थियो र त्यही गरियो । यसका लागि कम्पनीले सर्वसाधारणका लागि प्रिमियम मूल्यमा धितोपत्र जारी गर्ने विषय प्रस्तावमा राखी पारित गरेको थियो ।

छायाँ सेन्टरका लगानीकर्ता

पृथ्वी बहादुर पाँडे- ७ करोड ७८ लाख ३४ हजार ६ सय

दिपकमान शेरचन- ४ करोड ७३ लाख ७१ हजार

महेश्वर प्रकाश श्रेष्ठ-३ करोड ३० लाख ५५ हजार

सिद्धान्तराज पाण्डेय- ३३ लाख ७० हजार

योगेन्द्रबहादुर शाक्य- ९४ लाख एक सय

विकाश थापा- ८३ लाख ५५ हजार

प्रजन्य राजभण्डारी- २ करोड ५० लाख ६७ हजार

सिद्धान्त बहादुर पाँडे- १९ लाख ७२ हजार

राजधानी इन्भेष्टमेन्ट फण्ड प्रा.लि.- २ करोड २४ लाख ४ हजार

सुरेश लाल श्रेष्ठ- ५२ लाख

ज्ञानेन्द्र खनाल- १ करोड