त्रिभुवन विश्वविद्यालयको उपकुलपतिको जिम्मेवारी शिवलाल भुसाललाई

काठमाडौं । त्रिभुवन विश्वविद्यालयको उपकुलपतिको जिम्मेवारी शिक्षाध्यक्ष प्रा.डा. शिवलाल भुसालले पाएका छन् । त्रिविका कुलपतिसमेत रहेका प्रधानमन्त्री पुष्पकमल दाहाल ‘प्रचण्ड’ले कार्तिक १७ गते उनलाई उपकुलपतिको जिम्मेवारी दिएका हुन् ।

यसअघिका उपकुलपति डा. धर्मकान्त बास्कोटाको पदावधि कार्तिक १६ देखि सकिएपछि उपकुलपति पद रिक्त थियो ।

त्रिवि ऐन, २०४९ को दफा २१ (ख) अनुसार डा. भुसाललाई उपकुलपतिको जिम्मेवारी दिइएको त्रिविले जनाएको छ । सो दफा अनुसार उपकुलपति पद रिक्त भएमा सो पदपूर्ति नभएसम्म दैनिक कार्य सञ्चालन गर्न बढीमा तीन महिनाका लागि सहकुलपतिको परामर्शमा कुलपतिले उपकुलपतिको जिम्मेवारी तोक्न सक्ने व्यवस्था छ । यसरी तोकिने व्यक्ति वरिष्ठताका आधारमा हुने ऐनमा उल्लेख छ ।