राहत शिक्षक हेडमास्टर भएको नव जागृति माविको अभिभावक दिवस बन्यो उदाहरणीय

काठमाडौं महानगर वडा नं.६ रामहिटी बौद्धस्थित नव जागृति माध्यमिक विद्यालयले अभिभावक दिवस भव्य रूपमा मनाएको छ।

विद्यालय व्यवस्थापन समिति अध्यक्ष साङ्गे लामाको अध्यक्षतामा तथा वडा नं. ६ का अध्यक्ष को प्रमुख आतिथ्यतामा सम्पन्न कार्यक्रममा विद्यालयमा यसै महीना संचालित वार्षिक परीक्षामा उत्कृष्ट नतिजा ल्याउने विद्यार्थीहरुलाई पुरस्कार प्रदान गरिएको थियो।

कार्यक्रममा वार्षिक खेलकुद कार्यक्रम अन्तर्गत खेलकुदका विभिन्न विद्यामा सहभागी भएर प्रथम, द्वितीय र तृतीय स्थान हासिल गर्ने विद्यार्थीहरुलाई पनि मेडल र पुरस्कार प्रदान गरिएको थियो।

विद्यालयमा वर्षभरिमा सम्पूर्ण क्रियाकलाप राम्रो गर्ने विद्यार्थी, अनुशासित विद्यार्थी, जिज्ञासु विद्यार्थी, विद्यालय संचालित दिनमा पूर्ण रूपमा विद्यालयमा उपस्थित हुने विद्यार्थी, सरसफाइमा उत्कृष्ट हुने विद्यार्थीहरुलाई पनि पुरस्कृत गरिएको थियो।

विद्यालयका पूर्व प्रअ तथा सल्लाहकार समिति सदस्य ठाकुर प्रसाद खकुरेल, विव्यसका सदस्य मेनुका थापा, अभिभावक शिक्षक संघ अध्यक्ष ज्ञानु नेपाल लगायतको आतिथ्यतामा भएको कार्यक्रममा विद्यालयमा कार्यरत रहेका  सम्पूर्ण शिक्षकहरुलाई उपहार प्रदान गरिएको थियो भने विद्यालयका प्रधानाध्यापक डम्बर राईले अतिथिहरुलाई मायाको चिनो प्रदान गरेका थिए।

दिवा सत्र अतिरिक्त क्रियाकलाप ईन्चार्ज विनिता गौतमले उत्कृष्ट रूपमा सञ्चालन गरेको कार्यक्रममा सयौंको संख्यामा अभिभावकको उपस्थिति रहेको थियो। इन्चार्ज शंकरराज न्यौपानेले अतिथिहरुको मन्तव्यद्वारा स्वागत गरेका थिए भने प्रअ राईले कार्यक्रमका बारेमा प्रष्ट पारेका थिए।

अतिथि भइ उपस्थित पूर्व प्रअ खकुरेलले विद्यालय स्थापनादेखिका घटनाक्रम सुनाएका थिए। प्रमुख अतिथि भुवन लामाले विद्यालयको प्रगतिमा आफ्नो सदैव साथ रहने प्रतिबद्धता व्यक्त गरेका थिए।

विद्यार्थीलाई पुरस्कार वितरणमा इन्चार्ज संगीता श्रेष्ठ, शिला पोखरेल र दुर्गा खतिवडाले सहजीकरण गरेका थिए भने अन्य शिक्षकहरुले आफ्नो जिम्मेवारी पूर्णरूपमा निभाएका थिए। औपचारिक कार्यक्रम समापन भएपछि नतिजा प्रकाशन गरि वितरण गरिएको थियो।