अनेरास्ववियुद्वारा महाराजगञ्ज नर्सिङ क्याम्पसका सहप्राध्यापकमाथि हातपात

फागुन १९,  काठमाडौं । महाराजगञ्जस्थित नर्सिङ क्याम्पसका प्राध्यापकमाथि एमाले निकट अनेरास्ववियुका विद्यार्थीले हातपात गरेका छन् ।

स्वतन्त्र विद्यार्थी युनियन (स्ववियु) को निर्वाचनको सन्दर्भमा नर्सिङ क्याम्पसमा नर्सिङ क्याम्पस र बाहिरबाट आएका अनेरास्ववियुका नेताहरू हातपात गरेका हुन् ।

स्ववियु निर्वाचन नजिकिँदै गर्दा यसअघि पनि अनेरास्ववियुका निकट विद्यार्थीहरुले क्याम्पस प्रमुख र प्राध्यापकहरुमाथि विभिन्न किसिमका धम्की दिँदै आइरहेको नेविसंघ नर्सिङ क्याम्पसकी इकाइ अध्यक्ष रजनी खड्काले जानकारी दिइन् ।

स्ववियु निर्वाचनका लागि आज दल दर्ताको समय तोकिएको थियो । बिहीबार नै क्याम्पसमा रहेका सबै संगठनहरुलाई दल दर्ताको आह्वान गरिएको थियो । प्रतिनिधि ल्याउन भनिएकोमा अनेरास्ववियु निकट विद्यार्थीहरुले नमानेपछि क्याम्पस प्रमुख मुना राणाले आधिकारिक चिठ्ठीसहित दल दर्ताको लागि आउन आग्रह गरेकी थिइन् ।

तर सो विषयको छलफलकै क्रममा सोही क्याम्पसकी स्ववियु निर्वाचन समिति सदस्य समेत रहेकी सहप्राध्यापक मुना शर्मामाथि हातपात भएको खड्काले बताइन् ।

‘दल दर्ताकै विषयमा छलफल भइरहेको थियो । नर्सिङ क्याम्पस र बाहिरका समेत अनेरास्ववियु निकट विद्यार्थी नेताहरु आएर मुना म्याममाथि हातपात भएको हो ।’ उनले भनिन् ।

उनका अनुसार अनेरास्ववियु निकट नेताहरुले हातपात गर्दै दल दर्ताको लागि राखिएको फाइल र अन्य वस्तु प्रहार गर्दा शर्माको टाउकोमा चोट लागेको छ । उनीहरुले स्ववियुको कार्यालयमा समेत तोडफोड समेत गरेका छन् ।

बाहिरबाट समेत अनेरास्ववियुको नेताहरु परिचालन गरि प्राध्यापकमाथि हातपात हुनु दुखद रहेको नेविसंघ जनस्वास्थ्य केन्द्रीय विभागका अध्यक्ष सुमित बोहराले जानकारी दिए ।

स्ववियु निर्वाचन नजिकिँदै गर्दा नर्सिङ क्याम्पस जस्तो संवदेनशील ठाउँमा दादागिरी गरिनु गम्भीर विषय रहेकोले कारबाहीको माग गरेका छन् ।

घाइते शर्माको अहिले टिचिङ अस्पतालमा उपचार भइरहेको छ ।