झापाको कमल गाउँपालिकामा दुई विद्यार्थीलाई छात्रवृत्ति वितरण

झापा, २०८१ असार १ । प्राज्ञिक विद्यार्थी परिषद् नेपालको समन्वयमा “सेवा र विकासका लागि युवा” समूहद्वारा कमल गाउँपालिका–५ र ६ झापामा छात्रवृत्ति वितरण गरिएको छ।

कार्यक्रम अन्तर्गत श्री मंगलमय माध्यमिक विद्यालय र श्री वाणी माध्यमिक विद्यालयमा अध्ययनरत कक्षा १० की दुई विद्यार्थीहरू सुश्री अकलेशा कुमारी पण्डित र सुश्री दामिना पाण्डे लाई रु. १३,२०० (तेह्र हजार दुई सय रूपैयाँ मात्र) छात्रवृत्ति प्रदान गरिएको हो।

उक्त कार्यक्रम २०८१ साल असार १ गते आइतबारका दिन सम्पन्न भएको थियो। कार्यक्रममा विद्यालय व्यवस्थापन समितिका अध्यक्ष, विद्यालयका प्रधानाध्यापक, शिक्षकहरू, विद्यार्थीहरूका अभिभावक, र विद्यालयका विद्यार्थीहरूको उल्लेखनीय सहभागिता रहेको थियो।

कार्यक्रममा प्रमुख अतिथिका रूपमा प्राज्ञिक विद्यार्थी परिषद्, नेपाल कोशी प्रदेशका प्रदेश सह-सचिव श्री नगेश राई तथा कार्यालय प्रमुख श्री दुर्गेश मण्डल को विशेष उपस्थिति रहेको थियो।

छात्रवृत्ति वितरणको उद्देश्य प्रतिभावान तथा आर्थिक रूपमा पछाडि परेका विद्यार्थीलाई प्रोत्साहन गर्नु रहेको आयोजकहरूले जानकारी दिएका छन्।

यो कार्यक्रमले विद्यार्थीहरूमा अध्ययनप्रति उत्साह जागृत गर्नुका साथै सामाजिक उत्तरदायित्वप्रति युवाहरूको योगदानको उदाहरणीय प्रस्तुति गरेको सहभागीहरूले बताएका छन्।