अमेरिकाबाट डिपोर्ट भई नेपाल प्रहरीको हिरासतमा रहेका चार भुटानी शरणार्थीको मुद्दामा सुनुवाइ सकियो

सर्वोच्च अदालतका न्यायाधीशद्वय बालकृष्ण ढकाल र नित्यानन्द पाण्डेयको इजलासमा थुनामा रहेका अशोक गुरुङ, सन्तोष दर्जी, रोशन तामाङ र आशिष सुवेदीको तर्फबाट नारायणकुमार सुवेदीले दायर गरेको बन्दी प्रत्यक्षीकरणको रिटमाथि सुनुवाइ सकिएको हो ।

सुनुवाइ सकिएपछि चारै जनालाई प्रहरीको जिम्मा लगाइएको छ । हाल आदेश लेखनको कार्य भैरहेको छ ।

यसअघि गत वैशाख ४ गते न्यायाधीश हरिप्रसाद फुयालको इजलासले थुनामा रहेका चारै जनालाई देश निकाला नगर्न अल्पकालिन अन्तरिम आदेश जारी गर्दै वैशाख ११ गते (आज) सर्वोच्चको इजलासमा पेस गर्न आदेश दिएको थियो ।

नेपाल छिरेका चारसहित १८ भुटानी शरणार्थीलाई अमेरिकाले गत चैत ११ डिपोर्ट गरेको थियो । चार जना डिपोर्ट भएपछि भारत हुँदै भुटान पुगेकोमा भुटानले देश निकाला गरेको थियो ।

त्यसपछि नेपाल आइपुगेका उनीहरूलाई अध्यागमन कार्यालयले देशबाट निष्काशन गर्ने निर्णय गर्दै नियन्त्रणमा लिएको थियो ।

अन्य १४ जनाको अवस्था हालसम्म अज्ञात रहेको छ । उनीहरू नेपाली मूलका भुटानी भई नेपालमा शरणार्थीको रुपमा दर्ता भै शरणार्थीकै रुपमा अमेरिका पुनर्वास भएका थिए ।