अबदेखि विद्यार्थीले घरमा काम गरेकाे पनि अंक पाउने, हेर्नुस् यस्तो छ प्रावधान

शिक्षा, विज्ञान तथा प्रविधि मन्त्रालयले विद्यार्थीले घरमा गरेको कामको मूल्यांकन गरेर नम्बर दिने निर्णय गरेको छ । परीक्षामा लेखेको आधारमा मात्र मूल्याङ्कन गर्न नहुने भन्दै मन्त्रालयले विद्यार्थीले घरमा गरेको कामलाई मूल्याङ्कनमा जोड्न नम्बर दिने निर्णय गरेको हो ।

शिक्षा मन्त्री विद्या भट्टराईका अनुसार मूल्याङनको विधि बनाउने जिम्मा पाठ्यक्रम विकास केन्द्रलाई दिइएको छ । मूल्यांकनको विधि पाठ्यक्रम विकास केन्द्रले बनाउने हो । विज्ञसँग छलफल गरेर १५ दिनभित्र विधिको प्रस्ताव ल्याउन मन्त्री भट्टराईले निर्देशन दिनुभयो ।

कति लेख्छ भन्ने आधारमा नभएर विद्यार्थीको मूल्यांकन गर्दा बहुपक्षीय ढंगले गर्नुपर्छ भन्दै शिक्षा मन्त्री भट्टराईले आन्तरिक मूल्यांकनको विधिलाई परिवर्तन गर्ने निर्णय गरिएको बताउनुभयो । पछि समस्या नआउने गरी कुन विधिबाट जाने भनेर विज्ञको राय सुझावको आधारमा बनाउने उहाँले बताउनुभयो ।

पाठ्यक्रम विकास केन्द्रका महानिर्देशक इमनारायण श्रेष्ठले मूल्याङनको विधि छिट्टै बनाएर कार्यान्वयनमा लैजाने जानकारी दिनुभयो । शैक्षिक सत्र २०८२ देखि लागू गर्ने गरी काम गरिरहेको पनि उहाँले बताउनुभयो । मन्त्रालयले श्रम र सिपलाई सम्मान गर्न राम्रा कुरालाई पाठ्यक्रममा समावेश गर्न लागेको हो ।

‘विद्यार्थीले पढ्ने भनेको किताब वरिपरिको मात्र हो भन्ने छ । अब श्रम र सिपलाई सम्मान गर्न समाजको राम्रो कुरालाई पाठ्यक्रममा जोड्न लागेको मन्त्री भट्टराईले बताउनुभयो ।