डीन र क्याम्पस प्रमुखकाे नियुक्ति मेरिटोक्रेसीका आधारमा गर्न खोज्दा प्रधानमन्त्रीले हस्तक्षेप गरेकाे त्रिवि सदस्यहरूकाे आराेप

त्रिभुवन विश्वविद्यालयको साधारणसभा (नीति अधिवेशन) सम्पन्न भएको छ । कुलपति तथा प्रधानमन्त्री केपी शर्मा ओलीको अध्यक्षतामा सम्पन्न भएको सभामा कुलपति र उपकुलपतिमाथि विभिन्न खालका आरोप लागे ।

ओलीले विश्वविद्यालयमा अनावश्यक हस्तक्षेप गरेको आरोप खेपे भने उपकुलपति प्राडा केशरजंग बरालले ‘दुई नम्बरे उपकुलपति’ को आरोप खेपे । साधारणसभामा सदस्यहरूले डीन र क्याम्पस प्रमुखको नियुक्तिमा प्रधानमन्त्रीले हस्तक्षेप गरेको आरोप लगाए । सभा सदस्यहरूले डीन र क्याम्पस प्रमुख मेरिटोक्रेसीका आधारमा नियुक्त गर्न खोज्दा प्रधानमन्त्री र प्रधानमन्त्रीको दल नेकपा एमालेका नेताहरूको तर्फबाट हस्तक्षेप भएको बताए ।

त्यस्तै उपकुलपति बराललाई भने आफू दुई नम्बरमा सिफारिसमा परेर नियुक्ति भएको तर, अहिले मेरिटोक्रेसीको नाममा आफ्ना मान्छेलाई नियुक्त गर्न खोजेको आरोप लगाए । पुल्चोक इन्जिनियरिङ क्याम्पसका स्ववियु सभापति बिराज अर्यालले मेरिटोक्रेसीको नाममा आफ्ना मान्छे भर्ती गर्न खोजेको आरोप लगाए ।

आरोपहरूको जवाफ दिँदै प्रधानमन्त्री ओलीले जे सुकै विषय भए पनि प्रधानमन्त्रीले गरेको भन्दै भाष्य निर्माण भइरहेको बताए । ‘कतै बाढी पहिरो गयो भने प्रधानमन्त्रीका कारण गयो भन्छन् । कतै दुर्घटना भयो भने मेरै कारणले भयो भन्छन् । जस गरे पनि प्रधानमन्त्रीलाई आरोप नलगाई, प्रधानमन्त्रीलाई गाली नगरी चित्त नबुझ्नेहरू छन्,’ ओलीले भने, ‘सबै जना कानुनअनुसार चल्नुपर्छ । डीन र क्याम्पस प्रमुखको नियुक्तिमा मैले हस्तक्षेप गर्यो भने पत्रिमामा समेत छापिएको छ । मेरो कुनै हस्तक्षेप छैन । उपकुलपतिलाई तपाई राम्रोसँग चलाउनुहोस् मेरो कुनै हस्तक्षेप हुँदैन भनिरहेको छ ।

निष्पक्ष र मेरिटोक्रेसीमा प्रश्न नआओस् भन्ने हो ।’ विश्वविद्यालय अप्ठ्यारोमा नपरोस् राम्रोसँग चलोस् भनेर आफूले चासो राखेको तर, कुनै प्रकारको हस्तक्षेप नगरेको प्रस्ट पारे ।

उपकुलपति बरालमाथि लागेको आरोपमा आफ्नो जस्तो नियति भोग्न नपरोस् भने मेरिटका आधारमा नियुक्त गर्न लागेको बताए । उक्त आरोपको जवाफ दिँदै उनले भने, ‘जसरी मलाई  २ नम्बरे भनिराख्नु भएको छ । मैले जस्तो खेप्न नपरोस् भनेर काम गर्न खोजिएको हो ।’