काठमाडौं महानगरका सामुदायिक विद्यालयको एसइई नतिजा २५९% ले सुधार

काठमाडौं महानगरपालिकाभित्रका सामुदायिक विद्यालयले एसइई परीक्षाको नतिजामा व्यापक सुधार गरेका छन् । अघिल्लो वर्ष (०७९) को तुलनामा यस वर्ष (०८०) २५९ प्रतिशतले नतिजामा सुधार आएको महानगरले जनाएको छ ।

महानगरको सहरी योजना आयोगका सदस्य इन्जिनियर शैलेन्द्र झाका अनुसार ०८० मा एसइई परीक्षामा सहभागी भएका विद्यार्थीमध्ये पाँच सय ४५ जनाले ३.६१ देखि ४ जिपिए प्राप्त गरेका छन् । गत वर्ष एक सय ५० जनाले यो नतिजा प्राप्त गरेका थिए ।

यस्तै, ५८ वटा सामुदायिक विद्यालयबाट यस वर्ष तीन हजार नौ सय ५९ जना विद्यार्थीले परीक्षाका लागि आवेदन दिएका थिए । कुल परीक्षार्थीमध्ये तीन हजार ८६ जना उत्तीर्ण भएका छन् । आठ सय ७३ जनाले पुनः परीक्षा दिनुपर्ने भएको छ ।

गत वर्ष तीन हजार नौ सय १२ जना आवेदक थिए । झाका अनुसार ३.६० देखि ३.२१ सम्म जिपिए प्राप्त गर्ने विद्यार्थीको संख्या यस वर्ष एक हजार ५० छ । गत वर्ष यो संख्या चार सय ८८ थियो । यो समूहमा गएको वर्षभन्दा यस वर्ष ११३ प्रतिशतले नतिजा वृद्धि भएको छ ।