काठमाडौंका तीन स्थानका सडक आजबाट एकतर्फी हेर्नुस्

काठमाडौं महानगरपालिकाका तीन सडक बुधबारदेखि एकतर्फी (वान वे) हुने भएको छ । महानगरका ट्राफिकविज्ञ जगतमान श्रेष्ठका अनुसार सडक एकतर्फी बनाउन सबै तयारी पूरा भइसकेको छ ।

‘एकतर्फी बनाउन आवश्यक ट्राफिक चिह्नहरू राखिसकेका छौँ,’ श्रेष्ठले भने, ‘सडक एकतर्फी हुने ठाउँमा ट्राफिक चिह्नहरू त राखिएका छन् नै । केही दिन वान वे व्यवस्थापनका लागि ट्राफिक प्रहरी र नगर प्रहरीको टोलीसमेत खटिनेछन् ।’

काठमाडौं र ललितपुर जोड्ने सेतोपुल, गुसिंगाल, मिलनमार्ग हुँदै त्रिपुरेश्वर पुग्ने सडकमा त्रिपुरेश्वरबाट त्यो खण्डमा प्रवेश गर्न पाइँदैन । यस्तै, जमल र दरबारमार्गबाट रत्नपार्क आउँदा त्रिचन्द्र क्याम्पसअगाडिबाट बायाँ मोडेर गणेशस्थान, प्रज्ञाभवन हुँदै कमलादी मोडतर्फ आउन नपाइने बनाइएको छ । पुतलीसडकबाट काठमाडौं प्लाजा हुँदै हात्तीसारतर्फको सडकखण्डमा अब प्लाजाबाट बायाँ मोडिन पाइनेछैन । यहाँदेखि महेन्द्र सालिकसम्मको सडक एकतर्फी भएको छ ।

वडाका जनप्रतिनिधि, ट्राफिक प्रहरी कार्यालय र महानगरपालिकाको संयुक्त प्रयासमा अहिले दोहोरो सवारी सञ्चालन भइरहेका ती सडकलाई एकतर्फी बनाउन लागिएको हो । ती सडकमा एकतर्फी व्यवस्थित रूपमा बनाउन सडक दसैँपछि मार्किङसमेत गरिने भएको छ । ‘हाललाई नियमानुसार सञ्चालन गर्नका लागि ट्राफिक प्रहरी र नगर प्रहरीको टोलीलाई राख्छौँ । केही समयपछि ती ठाउँमा ट्राफिक साइन, मार्किङ गर्छौँ,’ श्रेष्ठले भने । महानगरले यी सडकलाई एकतर्फी बनाउन तीन महिनाअघिदेखि गृहकार्य थालेको थियो ।