बुटवलको विभिन्न शैक्षिकसंस्थाहरुमा विद्यार्थीद्वारा तालाबन्दी

भदौ, २१ काठमाडौ । बुटवलको विभिन्न शैक्षिक संस्थाहरुले चर्को शैक्षिक शुल्क असुलेको, छात्रावृत्ति वितरणमा अपार्दशिता, शैक्षिक सामग्री विक्रिमा सिन्डिकेट लगाएको भन्दै विद्यार्थीहरुद्वारा ताला बन्दी गरिएको छ। विद्यार्थीहरुद्वारा कालिका मानवज्ञान मावि, नविन औद्योगिक कदरबहादुर रिता मावि, कान्ति मावि तथा न्यूहोराइजन माविको लेखा शाखामा तालाबन्दी गरेको हो ।

लामो समय देखि शिक्षण संस्थाहरुसंग छलफल गर्दा समेत माग सम्बोधन नभएको भन्दै उक्त शैक्षिक संस्थाहरुमा अनेरास्ववियु (क्रान्तिकारी)ले मँगलबार तालाबन्दी गरेको बताइएको छ। बुटवल उपमहानगरपालिकाको शिक्षा शाखालाई बोधार्थ गराउँदै उक्त संगठनले माग पूरा नहुँदासम्म चरणबद्ध आन्दोलन जारी राख्नेगरी तालाबन्दी गरिएको जनाएको छ ।

अनेरास्ववियु (क्रान्तिकारी) का जिल्ला अध्यक्ष पारस राहदीले क्रमैसँग जिल्लाका अन्य पालिकाहरुमा समेत आफ्नो आन्दोलन र संघर्षका कार्यक्रमलाई अगाडी बढाउने बताए । सामुदायिक विद्यालयहरुले अभिभावकहरुबाथ सहयोग स्वरुप रकम लिन सक्ने भएपनि सोही बहाना बनाएर चर्को शैक्षिक सुल्क उठाउने गरेको उनको आरोप छ ।

यसैगरी राज्यले निशुल्क उपलब्ध गराउने शिक्षा जस्तो संवेदनशिल विषयमा विद्यालयहरुले मनोमानी शुल्क असुल्नुका साथै शैक्षिक सामग्रीहरु खरिदका लागि समेत एकै ठाउँबाट खरिद गर्नुपर्ने गरी अप्रत्येक्ष रुपमा सिन्धिकेट लगाइएको संगठनको आरोप छ । यसैगरी निजी शैक्षिक संस्थाहरुले महङ्गो शैक्षिक शुल्क अुल्नुका साथै विद्यालयमा अनिवार्य उपलब्ध गराउनु पर्ने शैक्षिक छात्रावृत्ति पारदर्शी नभएको आरोप लगाइएको छ ।

विद्यालयमा लागेका तालाबन्दी खुलाउनका लागि आन्दोलनरत पक्षसँग एक चरणको छलफल भइसकेको बुटवल उपमहानगरका शिक्षा शाखा प्रमुख मित्रमणी खनालले बताएका छन् । अनेरास्ववियु (क्रान्तिकारी) धर्मेन्द्र बास्तोला महासचिव रगेको पार्टी नेकपा बहुमतका जिल्ला संयोजक सुनिल बनजडेसँग आन्दोलनका बारेमा छलफल भएको उनले बताए । विद्यार्थीहरुले राखेका केही मागहरु जायज भए पनि ती मागहरु केन्द्रसरकार र नीतिगत सुधारका विषय भएको उनले बताए । आन्दोलनरत विद्यार्थी संगठनसँग पनि छलफलको तयारी रहेको खनालले बताए ।