प्राज्ञिकद्वारा बाह्रबिसेकाे शारदा माविका २९३ विद्यार्थीलाई शैक्षिक सामाग्री वितरण

भदौ ५, सिन्धुपाल्चोक ।   प्राज्ञिक  विद्यार्थी परिषद् नेपालले सिन्धुपाल्चोकको बाह्रबिसे नगरपालिकामा रहेको श्री शारदा माध्यमिक विद्यालयमा शैक्षिक सामग्री वितरण गरेको छ ।
आज विद्यालयको प्राङ्गणमा एक समारोहको आयोजना गरी परिषदको सेवा कार्य अन्तर्गत कक्षा १०, ११ र १२ मा अध्ययनरत २९३ जना विद्यार्थीहरूलाई व्याग, कपी, रेपिडेक्स पुस्तक, जमेक्ट्री बक्स, नेपाली बृहत् शब्दकोश, टोपी लगायतका शैक्षिक सामग्री वितरण गरिएको र बाँकी १० वटा हिमाली जिल्ला दोलखा, रसुवा, बझाङ, ताप्लेजुङ, मनाङ, मुस्ताङ, गोरखा, मुगु, डोल्पा र हुम्ला लगायतका जिल्लाहरूमा शैक्षिक सामग्रीहरू वितरण गर्न गइरहेको विद्यार्थी परिषद्का राष्ट्रिय महासचिव छितराज न्याैपाने जानकारी दिए ।

कार्यक्रममा विद्यार्थी परिषद्का राष्ट्रिय संगठन सचिव नारायण प्रसाद ढकालले विगत २७ बर्षदेखि निरन्तर सेवा कार्यहरू गर्दै आइरहेकाे र यसलाई निरन्तरता दिने क्रममा परिषद्ले ११ वटा हिमाली जिल्लाका विद्यार्थीलाई भारतीय जनता र भारत सकारबाट प्राप्त भएको शैक्षिक सामाग्री विद्यार्थीहरूलाई वितरण गर्न गइरहेको प्रष्ट पार्दै सामग्री उपलब्ध गराउने भारतीय जनता र भारत सरकार एवम् वितरणको समन्वय गर्ने प्राचार्य नीलप्रसाद सुवेदी तथा कार्यक्रममा उपस्थित बाह्रबिसे नगरका नगर प्रमुख लगायतलाई धन्यवाद ज्ञापन गर्नु भएको थियोे ।

बाह्रबिसे नगरपालिकाका नगर प्रमुख बालकृष्ण बस्नेतले परिषद्को यो सेवा कार्यको उच्च प्रसंशा गर्दै शिक्षा क्षेत्रमा सेवा गरेकोमा परिषदलाई धन्यवाद प्रदान गर्नु भएकाे थियोे ।
त्यसैगरी विद्यालयका प्राचार्य नीलप्रसाद सुवेदीले परिषदको यो कार्य आफ्नो विद्यालयमा गरेकोमा परिषदलाई धन्यवाद दिदै विद्यार्थीहरूको उज्ज्वल भविष्यको कामना गर्नु भएको थियोे ।

उक्त शैक्षिक सामग्री वितरण कार्यक्रममा राष्ट्रिय संगठन सचिव नारायण प्रसाद ढकाल, राष्ट्रिय महासचिव छितराज न्याैपाने, बाह्रबिसे नगरपालिकाका नगर प्रमुख बालकृष्ण बस्नेत, शारदा माध्यमिक विद्यालयका प्राचार्य नीलप्रसाद सुवेदी, ४ नम्बर वाडा वाडाध्यक्ष शेखर बहादुर भण्डारी , बाग्मती प्रदेश सचिव सुरेन्द्र भट्टराई , त्रिभुवन विश्वविद्यालय इकाई समिति सह सचिव निरन्जन पाठक लगायतको उपस्थित रहेको थियो ।

२०५२ सालमा स्थापना भई देशका ७७ वटै जिल्लाका शिक्षण संस्था, माध्यमिक तह (कक्षा ११ र १२) क्याम्पस तथा विश्वविद्यालयहरूमा कार्य गरिरहेको परिषदले विद्यार्थी, शिक्षक शिक्षाविद्हरूलाई संगठित गर्दै असल व्यक्ति निर्माणका माध्यमबाट राष्ट्रलाई परम् वैभवको स्थितिमा पुर्याउने लक्ष्य लिएको छ ।