गगन थापाको वडाबाट कांग्रेसले खाता खोल्यो, वडाध्यक्षसहित प्यानलै दोब्बर मतले विजयी

काठमाडौं : स्थानीय तह निर्वाचनअन्तर्गत नेपाली कांग्रेसले काठमाडौं महानगरपालिकामा खाता खोलेको छ।

काग्रेसले महामन्त्री गगन थापाको गृह वडा काठमाडौं- ३० मा दोब्बर मतले विजयी हासिल गरेको हो।

वडा नम्बर ३० मा कांग्रेसका दलबहादुर कार्की २ हजार ६१ मतसहित वडाध्यक्ष निर्वाचित भएका छन्। उनका निकटतम प्रतिद्वन्द्वी एमालेका उम्मेदवार एमालेका कृष्णभक्त खड्गी ९४८ मतसहित पराजित भएका छन्।

कांग्रेसका कार्कीले १ हजार ११३ मतान्तरले एमालेका खड्गीलाई पराजित गरेका हुन्। यो दोब्बर बढी मतान्तर हो।

त्यसैगरी राप्रपाका उम्मेदवारले ५२१ र एकीकृत समाजवादीका उम्मेदवारले ३४७ मत प्राप्त गरेका छन्।

वडा महिला सदस्यमा कांग्रेसकी इन्दिरा श्रेष्ठ सिंहले १ हजार ९२७ मत प्राप्त गरेर विजयी हासिल गरेकी छन्। एमालेका उम्मेदवारले ८९५, राप्रपाले ५८९ र एकीकृत समाजवादीका उम्मेदवारले २७२ मत प्राप्त गरेका छन्।

दलित महिला सदस्यमा पनि कांग्रेसले १ हजार ८९५ मत पाएर विजयी भएको छ। कांग्रेसकी शर्मिला श्रेष्ठ महतो निर्वाचित भएकी छन्। एमालेका उम्मेदवारले ९४०, राप्रपाका उम्मेदवारले ६२९ मत प्राप्त गरेका छन्।

खुला दुई सदस्यमा पनि कांग्रेस नै विजयी भएको छ। दुबै वडा सदस्यमा कांग्रेसका मनोज कुमार डंगोलले १ हजार ८२९ र मिलन कुमार खड्का खत्रीले १ हजार ७२४ मत प्राप्त गरेका छन्।

प्रतिद्वन्द्वी एमालेका उम्मेदवारले ९९० र ९३३ मत प्राप्त गरेका छन्। राप्रपाका उम्मेदवारले ५२४ र ६०१ मत प्राप्त गरेका छन्। एकीकृत समाजवादीका उम्मेदवारले २४१ र २२६ मत प्राप्त गरेका छन्।

वडा नम्बर ३० महामन्त्री थापाले मतदान गरेको वडा हो। थापाले मैतिदेवी मतदान केन्द्रबाट मतदान गरेका थिए। थापाको बसोबास पनि यही वडामा रहेको छ। यही वडाबाट कांग्रेसले महानगरपालिकामा दोब्बरले विजयी सुरुवात गरेको हो।

यसअघि एमालेले १ देखि ४ वडा प्यानल र ५ मा वडाध्यक्ष जितिसकेको छ। महानगरपालिकाको मेयरमा भने स्वतन्त्र उम्मेदवार बालेन शाहले निरन्तर अग्रता लिइरहेका छन्। एमालेका केशव स्थापित दोस्रो र कांग्रेसकी सिर्जना सिंह तेस्रो स्थानमा रहँदै पछ्याइरहेका छन्।