विरगन्ज : नेपाली कांग्रेस बाराको सभापति चयनका लागि दोस्रो चरणको निर्वाचन हुने भएको छ । बुधबार भएको निर्वाचनमा सभापतिका ३ जना उम्मेदवारमध्ये कसैले पनि ५१ प्रतिशत मत नल्याएपछि सभापति पदका लागि फेरि दोस्रो चरणको मतदान हुने भएको हो ।
बुधबार भएको निर्वाचन अन्तर्गत सभापति पदको बिहीबार बिहान सम्पन्न मतगणना अनुसार संस्थापन पक्षका राजेश राय यादवले सबैभन्दा बढी ८३३ , संस्थापन पक्षकै शम्भुबहादुर बुढाथोकीले ८०९ र संस्थापन इतर पक्षका रामान्द यादवले ७०८ मत प्राप्त गरेको प्रमुख निर्वाचन अधिकृत राजकुमार उप्रेतीले जानकारी दिए ।
कांग्रेसको विधानअनुसार सभापतिमा निर्वाचित हुनका लागि कुल खसेको मतको ५१ प्रतिशत मत प्राप्त गर्नुपर्छ । तर बुधबार भएको निर्वाचनमा सभापतिका ३ जना उम्मेदवारमध्ये कसैले पनि ५१ प्रतिशत मत ल्याउन नसकेपछि अब सभापतिका लागि पहिलो चरणमा भएको निर्वाचनमा प्रथम र दोस्रो मत ल्याएका राजेशराय यादव र शम्भु बुढाथोकीबीच प्रतिस्पर्धा हुने उप्रेतीले जानकारी दिए ।
दोस्रो चरणको निर्वाचनका बारेमा निर्णय गर्न आज बिहान ८ बजे सभापतिका उम्मेवारहरुलाइ राखेर निर्वाचन समितिले छलफल गर्ने कांग्रेस बाराको प्रदेश क्षेत्रका सभापति लोकश सिंहले जानकारी दिए । यसअघि बुधबार कलैयास्थित श्री ३ चन्द्र मावि परिसरमा भएको पहिलो चरणको निर्वाचनमा कुल २ हजार ४ सय ९३ मत मध्ये २ हजार ४ सय मत खसेको थियो । त्यसअघि गत शनिबार कांग्रेस बाराको निर्वाचन, करिब ५० प्रतिशत मत खसेर धाँधली भएको भन्दै स्थगित भएको थियो ।
प्रतिकृया दिनुहोस्