देशैभरका पालिका कार्यालय खरानी हुँदा काठमाडौं महानगर सुरक्षित !

के बालेनले नै जोगाए महानगर ?
भदौ २३ र २४ गते भएको जेनजी आन्दोलनको विषयमा काठमाडौं महानगरपालिकाका प्रमुख बालेन्द्र साह (बालेन)ले सामाजिक सञ्जालमा स्टाटस लेखेर वातावरण बनाउने र आन्दोलन सम्पन्न भइसकेपछि पनि स्टाटस लेखेर नै सरकार निर्माण लगायत आगामी विषयमा अभिव्यक्ति दिए ।

सो अवधिमा सार्वजनिक मञ्चमा आएर प्रत्यक्ष रूपमा उनले केही बोलेका छैनन्, साथै, आन्दोलनमा भूमिका निर्वाह पनि गरेका छैनन् ।

तर, आन्दोलनको सुरुवात र अन्त्यको चरणमा भने सामाजिक सञ्जालमा भने उनी केन्द्रमा नै रहेको देखियो । हामी नेपालीका नेतृत्वकर्ता सुदन गुरुङसँगको पुरानो सम्बन्धदेखि अहिले बनेको अन्तरिम सरकारमा उनी निकटका व्यक्ति भएको विषयले उनी यो आन्दोलनको योजनाकार समूहमा भएको धेरैले अनुमान गरेका छन् ।

जसले गर्दा नै काठमाडौं महानगर भित्रका कार्यालयहरू योजनाबद्ध रूपमा जोगाइएको हुनसक्छ । स्मरणीय छ, काठमाडौं उपत्यकाकै अन्य नगरपालिका र पालिका ध्वस्त बनाइएको छ ।