काठमाडौं–७ को सेवा प्रवाह मित्रपार्कस्थित आफ्नै भवनबाट सुरु

यसअघि वडा कार्यालय गङ्गाहिटीस्थित भाडाको भवनबाट सेवा दिँदै आएको थियो । अब वडा नं. ७ का सेवाग्राहीले आवश्यक सम्पूर्ण सेवा आफ्नै वडा भवनबाट प्राप्त गर्न सक्नेछन् ।

वडा सचिव पदमकेशर अधिकारीका अनुसार भवन निर्माणका लागि आर्थिक वर्ष २०८०/८१ को अन्त्यतिर ठेक्का सम्झौता भएको थियो र करिब १३ महिनाभित्रै निर्माण सम्पन्न भएको हो । ‘भवनको भुईँ तला पहिले नै थियो । बलियो फाउन्डेसन भएकाले मोडिफाइ गरेर अढाई तला थप गरिएको हो ।’, उनले भने ।

नव–निर्मित भवनको भुईँतलामा प्रशासनिक कक्ष, पहिलो तलामा जनप्रतिनिधि तथा मेलमिलाप कक्ष र दोस्रो तलामा सभाकक्षसहित थप प्रशासनिक कक्षहरू रहेका छन् । अब वडास्तरीय स–साना कार्यक्रमहरू पनि वडा भवनकै सभाकक्षमा आयोजना गर्न सकिने वडा सचिव अधिकारीले जानकारी दिए ।