हिमालय कलेजमा कक्षा ११ का नव विद्यार्थीहरूका लागि भव्य अभिमुखिकरण कार्यक्रम सम्पन्न

काठमाडौं, कोटेश्वर । संस्कारयुक्त शिक्षा भन्ने मूल मन्त्रका साथ विगत २५ वर्षदेखि उत्कृष्ट शैक्षिक सेवा प्रदान गर्दै आएको हिमालय कलेजले आइतबार कक्षा ११ का नव आगन्तुक विद्यार्थीहरूका लागि एक दिने भव्य अभिमुखिकरण कार्यक्रम सम्पन्न गरेको छ।

कार्यक्रमको प्रारम्भमा कलेजकी निर्देशक सङ्गीता सिलवालले नयाँ विद्यार्थीहरूलाई हार्दिक स्वागत गर्दै, जुनसुकै विषय अध्ययन गरे पनि असल, सक्षम र योग्य व्यक्तित्व निर्माणमा ध्यान दिनुपर्नेमा जोड दिनुभयो। उहाँले विद्यार्थीहरूलाई शैक्षिक यात्रा मात्र नभई जीवनका सबै आयाममा सफल बन्न प्रेरित गर्नुभयो।

एक दिवसीय अभिमुखिकरण कार्यक्रममा विद्यार्थीहरूले आकर्षक सांस्कृतिक प्रस्तुति दिएका थिए। मेरो भ्वाइस युनिभर्स का प्रतिस्पर्धी गायक धु्रव बी.क.ले विशेष सांगीतिक प्रस्तुति दिएका थिए भने कलाकार तथा जादुगर शेरबहादुर गुरुङले दर्शकलाई मन्त्रमुग्ध पार्ने जादु प्रस्तुत गर्नुभयो।

सो अवसरमा +2 कार्यक्रमका संयोजकले कलेजका नियम–कानून, अनुशासन नीति, तथा विभिन्न विषयका संकाय सदस्यहरूको परिचय गराउँदै विद्यार्थी जीवनमा आवश्यक अनुशासन र जिम्मेवारीबारे विस्तृत जानकारी दिनुभयो।

कार्यक्रमले नयाँ विद्यार्थीहरूलाई कलेजको वातावरण, शैक्षिक गुणस्तर, तथा सांस्कृतिक विविधतासँग नजिक ल्याउने उद्देश्य पूरा गरेको आयोजकहरूले जनाएका छन्।