काठमाडौंका २१ सामुदायिक विद्यालयको शतप्रतिशत सफलता : एसईई २०८१ मा उत्कृष्ट नतिजा

काठमाडौं, असार २० । काठमाडौं जिल्लाका २१ वटा सामुदायिक विद्यालयले माध्यमिक शिक्षा परीक्षा (एसईई) २०८१ मा शतप्रतिशत सफलता हासिल गरेका छन् । शिक्षा विकास तथा समन्वय इकाई, काठमाडौंले सार्वजनिक गरेको विवरण अनुसार ती विद्यालयबाट परीक्षामा सहभागी भएका सबै विद्यार्थी उत्तीर्ण भएका हुन् ।

सामुदायिक विद्यालयप्रति रहेको आम धारणा बदल्न यी विद्यालयहरूको सफलता महत्वपूर्ण मानिएको छ । धेरैजसो विद्यालयहरू न्यून स्रोतसाधन र पूर्वाधारका बाबजुद पनि १०० प्रतिशत नतिजा निकाल्न सफल भएका हुन् ।

सबैभन्दा धेरै परीक्षार्थी सहभागी गराई १०० प्रतिशत नतिजा ल्याउने विद्यालयमा तारकेश्वर नगरपालिका–५ स्थित पृथ्वीनारायण माध्यमिक विद्यालय, गोलढुङ्गा अग्रस्थानमा छ । उक्त विद्यालयका ९८ जना विद्यार्थी परीक्षामा सहभागी भई सबै उत्तीर्ण भएका छन् ।

त्यसैगरी, बाल उद्दार माध्यमिक विद्यालय, कपन (८४ जना), श्रम राष्ट्रिय मा.वि., कुमारीगाल (७१ जना), टंगाल मा.वि., टंगाल (६४ जना), मेहेन्द्र बाैद्व मा.वि., बाैद्व (५१ जना) लगायतका विद्यालयहरू पनि शतप्रतिशत नतिजा ल्याउन सफल भएका छन् ।

शतप्रतिशत नतिजा ल्याउने विद्यालयहरूको सूची यसप्रकार छ :
1. पृथ्वीनारायण मा.वि., गोलढुङ्गा – ९८
2. बालउद्दार मा.वि., कपन – ८४
3. श्रम राष्ट्रिय मा.वि., कुमारगाल – ७१
4. टंगाल मा.वि., टंगाल – ६४
5. मेहेन्द्र बाैद्व मा.वि., बाैद्व – ५१
6. अरुणोदय मा.वि., फर्पिङ – ३८
7. फुटुङ मा.वि., फुटुङ तारर्केश्वर – ३२
8. केन्द्रिय बहिरा मा.वि., नक्साल – २८
9. जीतपुर मा.वि., जीतपुरफेदी , तारकेश्वर – २८
10. सेतीदेवी मा.वि., साेखेल – २६ दक्षिणकाली
11. बालविकास मा.वि., इचंङ – २२
12. त्याैड मा.वि., तलाछि – २१ कामनपा
13. यज्ञमति से. स्कुल, कपन – २१ बुढानिलकण्ठ
14. जगन्नाथ मा.वि., कारागार – १९ कामनपा
15. श्रीकृष्ण मा.वि., छैमले – १८ दक्षिणकाली
16. राष्ट्रिय मा.वि., इन्द्रायणी – १८ शंखरापुर
17. मंगलादेवी मा.वि., बत्तिसपुतली – १७
18. काभ्रेस्थली मा.वि., काभ्रेस्थली – १७ तारकेश्वर
19. नेपाल वेद विद्याश्रम संस्कृत मा.वि., बनस्थली –१४
20. सेतीदेवी मा.वि., चाउँरेचौर – १२ दक्षिणकाली
21. भैरवनाथ मा.वि., चन्द्रागिरी – ६

शिक्षा विकास तथा समन्वय इकाई, काठमाडौंका अनुसार, यी विद्यालयहरूका शिक्षक, विद्यार्थी, अभिभावक र व्यवस्थापन समितिको समन्वय र मेहनतले उत्कृष्ट परिणाम सम्भव भएको हो ।

सामुदायिक विद्यालयहरूले निरन्तर सुधार गर्दै गएका छन् भन्ने प्रमाणस्वरूप यो सफलता देखिएको हो । यस्ता विद्यालयहरूको अनुभव र अभ्यासलाई अन्य विद्यालयले समेत अनुकरण गर्नु आवश्यक रहेको शिक्षा विज्ञहरूको भनाइ छ ।