मान्छेको पहिलो चाहना हुन्छ, आफ्नै एउटा घर होस् । त्यसपछिको दोस्रो चाहना, आफु बस्ने ठाउँ सुविधा सम्पन्न र मिलेको समुदाय पनि होस् भन्ने हुन्छ । तर, सबै ठाउँमा मिलेको समुदाय र अत्यावश्यक न्यूनतम सुविधाहरु उपलब्ध नहुन पनि सक्छन् ।
के तपाईं एउटै गेटबाट छिर्ने समुदायमा बस्नेबारे सोच्नुभएको छ ? यदि तपाईं व्यवस्थित सामूहिक आवास परियोजना हाउजिङका घरमा बस्नुभयो भने चाहेजस्तै सुविधा र समुदाय पनि पाउन सक्नुहुन्छ ।
यो मुख्य रुपमा समुदायका सबैजना एउटै गेटभित्र सुरक्षित साथ समुदाय बनाएर बस्ने स्थान हो जसलाई हाउजिङ वा कोलोनी भनिन्छ । समुहमा बस्न रुचाउनेहरुका लागि हाउजिङ उपयुक्त हुन्छ । सामूहिक आवासभित्र सामूहिक रुपमा प्रयोग गर्न सकिने त्यस्ता सुविधाहरु पनि उपलब्ध हुन्छन् जसले तपाइँको बसाइलाई अझ सहज बनाउँछ ।
काठमाडौं उपत्यका, पोखरा, बुटवल–भैरहवा, विराटनगर लगायत शहरहरुमा आधुनिक सुविधा सम्पन्न हाउजिङ परियोजना बनिरहेका छन् जहाँ बस्नका लागि मान्छे सबैभन्दा बढी लालयित हुने गर्छन् ।
कुनै पनि ठाउँमा हाउजिङ परियोजना लञ्न गर्ने वित्तिकै बुकिङ भइहाल्छ । हाउजिङमा घर निर्माण सम्पन्न हुनै पर्दै, साइट पनि क्लियर नगर्दै बुकिङ सकिन्छ । पछिल्लो समय काठमाडौं उपत्याका, बुटवल–भैरहवा र विराटनगरमा झन्डै एक दर्जन हाराहारी हाउजिङ परियोजना बन्दैछन्, ती सबै परियोजनाका घरहरु करिव बुकिङ सकिइसकेको रियलस्टेड डेभलपर कम्पनीले बताउँछन् ।
काठमाडौं उपत्याकामा खाली जग्गा भेट्याउन मुस्किल भइसकेको र जग्गा भेटिहाले पनि मूल्य अचाक्ली महंगो भइसकेको हुँदा पर्याप्त हाउजिङ परियोजना आउन नसकेको नेपाल उद्योग वाणिज्य महासंघका सहरी विकास समितिका सभापति मिनमान श्रेष्ठ बताउँछन् ।
‘हाउजिङका घरको माग धेरै छ, तर पर्याप्त हाउजिङ बन्न सकेका छैनन्’ श्रेष्ठ भन्छन्, ‘कुनै ठाउँमा हाउजिङ परियोजना आउन थाले निर्माण सुरु नहुँदै बुकिङ सम्पन्न भइहाल्छ ।’ महंगो मूल्यमा जग्गा किनेर हाउजिङ परियोजना बनाउँदा घरको मूल्य पनि अचाक्ली महंगो पर्ने हुनाले डेभलपरहरु पछाडि सर्न थालेका हुन् । त्यसमाथि राज्यको नीति पनि व्यवस्थित सामूहिक आवास विकासलाई निरुत्साहित गर्ने खालको रहेको आवास विकासकर्ता कम्पनीको गुनासो छ ।
हाउजिङ परियोजनाभित्र खुला ठाउँ राख्नुपर्ने, चौडा सडक, खेल्ने ठाउँ, हेल्थ क्लब, ग्रोसरी सप, स्वीमिङ पुल लगायत सुविधाहरु बनाउनुपर्ने हुँदा घरको मूल्य बाहिरभन्दा केही महंगो हुने गर्छ।
हाउजिङ परियोजनाका घरहरु महंगो पर्ने हुँदा हुँदै पनि किन शहरीया परिवारको आकर्षण बढ्दो छ त ? आउनुहोस्, हामी आज यही बिषयमा छलफल गर्दै छौं । हाउजिङका घरको सबैभन्दा राम्रो पक्ष भनेको सुरक्षा हो, त्यहाँ मुख्य गेटमा सेक्युरिटी गार्ड चौबिसै घण्टा ड्यूटीमा हुन्छ भने सीसी क्यामेराले निगरानी पनि गरिरहेको हुन्छ । यसबाहेक हाउजिङमा थुप्रै सामुदायिक (कमन रुपमा प्रयोग गर्न मिल्ने) सुविधाहरु पनि हुन्छन् ।
हेल्थ क्लब, पार्क, बच्चाहरुको लागि खेलमैदान, स्विमिङ पुल, जिम हल, ग्रोसरी सप, रेष्टुरेन्ट, थियटर लगायत सुविधा हाउजिङभित्र उपलब्ध हुन्छन् । यी सुविधाहरु हाउजिङ परियोजना हेरिकन उपलब्ध हुन सक्छन् । सबै सुविधाहरु उपलब्ध हुने हाउजिङ परियोजनाका घरको मूल्य धेरै महंगो पर्छ ।
सिजी प्रोपर्टीले भैंसेपाटीमा बनाउन लागेको सुविधा सम्पन्न हाउजिङ परियोजना सिजी भिल्लामा तीन तले एउटै घरको मूल्य १३ करोड रुपैयाँसम्म तोकिएको छ । हाउजिङका घरमा बस्दा खानेपानी, ढल, बिजुली, फोहोर, पार्किङ लगायतको चिन्ता लिइरहनु पर्दैन । यो सबै हाउजिङ परियोजनाले नै व्यवस्थापन गरिदिन्छ ।
सुविधै सुविधा हुने भएकाले बाहिर घर किनेर वा बनाएर बस्नुभन्दा हाउजिङ वा कोलोनीमा बस्नु राम्रो मानिन्छ । दुनियाँको जुनसुकै स्थानमा पनि अहिले हाउजिङको बसाइ लोकप्रिय बन्दै गइरहेको आवास विकासकर्ता बताउँछन् ।
तपाईंले हाउजिङका घरमा बस्नु अघि यसको फाइदा र बेफाइदा बारे बुझेर बुझ्नु लाभदायक हुन्छ ।
कम्पाउन्ड समुदाय भनेको के हो ?
कम्पाउन्ड घेरेर एउटै गेटबाट भित्र छिर्न मिल्ने समुदायमा उच्च गुणस्तरीय भवनहरु र अत्यावश्यक सुविधाहरु प्राप्त गर्न सकिन्छ । हाउजिङभित्र बाहिरी व्यक्तिहरुको लागि प्रवेश र उपयोग गर्न अनुमति हुँदैन ।
प्रायः मानिसहरु यसको फाइदा र उपलब्धताको बारेमा मात्र सोच्दछन् तर हाउजिङमा बस्ने चाहाना पुरा गर्न कसैका लागी अत्यन्तै महँगो र आफ्नो क्षमता भन्दा बाहिर पनि हुनसक्छ । हाउजिङ परियोजनाभित्र प्रवेश गर्नका लागि एउटा मुख्य गेट बनाइएको हुन्छ । वरिपरि पर्खाल लगाएर घेरिएको हुन्छ । त्यहाँभित्र बनेका घरहरुमा फेरी छुट्टै कम्पाउन्ड र गेट बनाइएको हुन्छ ।
हाउजिङमा गाडी पार्किङ, पैदलयात्रीको आवागमन, बच्चाहरु खेल्ने ठाउँ लगायतका लागि ठाउँ छुट्याइएको हुन्छ । हाउजिङका घरहरु बाहिर बनाइएका घरभन्दा निकै फरक हुन्छन् । हाउजिङमा एकान्त र अरुबाट टाढा रहन सकिदैन । गेटेट समुदायमा प्रायः घरहरु एक अर्काको नजिक हुन्छन् र छिमेकीको मित्रता पनि राम्रो हुन्छ ।
सामुदायिक आवासका सेवा–सुविधाहरुः
हाउजिङमा बस्दा धेरै सेवा–सुविधाहरु उपभोग गर्न पाइन्छ ।
- स्वीमिङ पुल
- जिम हल
- पार्क
- खेलमैदान
- बच्चा खेल्ने ठाउँ
- रेष्टुरेन्ट
- लाइबेरी
- सुरक्षा गार्ड
- पानी आपूर्ति
- ग्रोसरी सप
सामुदायिक आवासका फाइदाहरु
सुरक्षा गार्ड
हाउजिङ तथा कोलोनीमा सुरक्षा गार्डको साथै बलियो पर्खालहरु र सीसी क्यामेराको निगरानी भइरहने हुँदा बसाइ सबैभन्दा सुरक्षित हुन्छ । मुख्य गेटमा पासवर्ड कोडसहित सुरक्षित राख्न सकिन्छ ।
गोपनियता
सामुदायिक आवासहरुमा धेरैजसो गेट नजिक ठुलो पर्खाल र प्रवेश क्षेत्रमा निकै कडाई गरिएको हुन्छ । त्यहाँ भित्र अनावश्यक मान्छे छिर्ने अनुमति हुदैन ।
निजी पार्किङ
हाउजिङमा बस्नेहरुको लागि पार्किङको छुट्टै व्यवस्था हुन्छ । त्यहाँ बस्ने व्यक्तिहरुको लागि निश्चित एरिया छुट्टाइएको हुन्छ जहाँ सहजै सवारी साधन पार्किङ गर्न सकिन्छ ।
मर्मत
सामुदायिक आवासमा बस्नेले मर्मत सम्भारको पनि त्यति चिन्ता लिनुपदैन । त्यहाँ सामुहिक रुपमा प्रयोग गरिने साझा सेवा तथा सुविधाको मर्मत खर्चको जिम्मा घरधनीले ब्यहोर्नु पर्दैन । तर, घरभित्र हुने मर्मत सम्भारको खर्च भने आफै ब्यहोर्नुपर्ने हुन्छ ।
सामुदायिक आवासको बेफाइदाहरु
पाहुनाहरुको लागि असुविधा
सामुहिक आवासमा आउने पाहुनाहरुलाई असुविधा हुन सक्छ, किनभने त्यहाँ आउने प्रत्येक पाहुनालाई गेटपालेले नाम नम्बरसहित के कति कारणले आएको हो सबै सोध्छन् । जुन परिवारको आफन्त हो उ आएर नबोलाएसम्म गार्डले घरभित्र छिर्न पनि दिँदैनन् । यसले पाहुनाका रुपमा जाने व्यक्तिलाई केही असहज हुन सक्छ न् ।
महँगो
सामुहिक आवासमा बस्नको लागि व्यक्तिगत घरहरु महँगो पर्छन् । हाल काठमाडौँ उपत्यकाका हाउजिंगभित्र ३ आना जग्गामा बनेका अढ़ाइ तले घरकै मूल्य ३ करोड हाराहारी पर्छ। हाउजिंगबाहिर भने तुलनात्मक हिसाबमा उस्तै क्षेत्रमा उस्तै जग्गामा बनेका घरको मूल्य २ करोड आसपास रहने रियल इस्टेट व्यवसायी बताउँछन्। हाउजिंगमा व्यवस्थित आवासका सम्पूर्ण सुविधा रहने हुनाले पनि घरको मूल्य बढी पर्ने बताइन्छ।
स्थान
सामुदायिक आवास निर्माणको लागि ठुलो स्थानको आवश्यकता पर्छ । मुख्य शहरी भेगमा खाली ठाउँ भेट्याउन मुस्किल पर्छ । यदि भेटिहाले पनि निकै महंगो पर्ने हुनाले जग्गा किनेर घर बनाएर बिक्री गर्न कठिन हुन्छ । त्यसैले अधिकांश डेभलपर कम्पनीहरुले शहरबाट अहिल बाहिर हाउजिङ परियोजना बनाउने गर्छन । त्यसो हुँदा शहरमा काम विशेषले आवात जावत गर्नका लागि लामो यात्रा र ट्राफिक ब्यहोर्नुपर्ने हुन सक्छ ।
सम्वन्धित समाचारहरु
ताजा समाचार
प्रतिकृया दिनुहोस्