प्रसाईं पक्राउ प्रकरण : भिडियो बनाउने दर्जन युट्युबर पनि अनुसन्धानमा तानिँदै

विवादित मेडिकल व्यवसायी दुर्गा प्रसाईं पक्राउ प्रकरणमा करिब एक दर्जन युट्युबर पनि तानिने भएका छन् ।

नेपाल प्रहरीको केन्द्रीय अनुसन्धान ब्यूरो (सीआईबी) ले प्रधानमन्त्री केपी शर्मा ओलीको ३२ अर्बभन्दा बढी लगानी कम्बोडियामा रहेको भनेर बनाइएको फेक भिडियो प्रकरणमा ती युट्युबरलाई पक्राउ तयारी गरेको हो ।

प्रसाईंले सोमबार भक्तपुरस्थित निवासमा युट्युबर सम्मेलन गरेका थिए । जहाँबाट प्रसाईंले उपलब्ध गराएको फेक डकुमेन्टलाई आधार बनाएर भिडियो कन्टेन्ट बनाएका करिब दर्जन युट्युबरलाई पक्राउ तयारी गरिएको सीआईबीका एक अधिकारीले बताए ।

‘प्रसाईंले उपलब्ध गराएको विवरण फेक रहेको पुष्टि भइसकेको छ । त्यस डकुमेन्टका आधारमा भिडियो सामग्री बनाउने युट्युबरमाथि अनुसन्धान भइरहेको छ’, सीआईबीका ती अधिकारीले खबरहबसँग भने, ‘हामीले ती युट्युबरले बनाएको भिडियो सामग्री अध्ययन गरेका छौँ, हेरेका छौँ । जस-जसले फेक सामग्री फैल्याए, ती सबै हाम्रो अनुसन्धानको दायरामा आउँछन्, पक्राउ पर्छन् ।’

यता सीआईबीले प्रसाईंलाई साइबर अपराध, कागजात कीर्ते र मानहानीको कसुरमा अनुसन्धान अघि बढाएर मुद्दा चलाउने तयारी गरेको छ ।

सीआईबीले ‘फेक डकुमेन्ट’ को सहारामा प्रधानमन्त्री केपी शर्मा ओलीविरुद्ध दुष्प्रचार गरेको भेटिएपछि प्रसाईंलाई पक्राउ गरिएको जनाएको छ ।

नेकपा एमालेका अध्यक्षसमेत रहेका ओलीले कम्बोडियाको टेलिकममा ३२ अर्ब नेपाली रुपैयाँ लगानी गरेको दाबीसहित प्रसाईंले भक्तपुरस्थित निवासमै युट्युबरको सम्मेलन गरेका थिए ।

त्यसपछि उनले सोमबार नै फेसबुकमा एक भिडियो पनि सार्वजनिक गरेका थिए । जसमा ओलीको नाममै त्रुटि भेटिएको छ । प्रसाईंले सार्वजनिक गरेको उक्त भिडिओ भाइरल भएपछि सीआईबीको टोलीले उनलाई घरबाटै पक्राउ गरेको हो ।