बालविकास शिक्षकको सेवा सुविधा वृद्धि गर्छौ : शिक्षा मन्त्री भट्टराई

काठमाडौं,१२ भदौं । शिक्षा, विज्ञान तथा प्रविधि मन्त्री विद्या भट्टराईले बालविकासका शिक्षकहरूको सेवा सुविधा वृद्धि गरिने बताएकी छन् । उनले सुविधा वृद्धि बारे अर्थ मन्त्रालयसँग कुराकानी भइरहेको बताउँदै थोरै भएपनि सेवा सुविधा वृद्धि गर्न कुरा भईरहेको बताएकी हुन् ।

शिक्षा पत्रकारहरूसँग शिक्षा मन्त्रालयमा भएको छलफलमा बोल्दै अनिवार्य तथा निःशुल्क शिक्षा ऐनले बालविकास शिक्षकलाई महत्व दिएको र त्यो महत्वलाई ध्यान दिएर उहाँहरूको सुविधा कसरी वृद्धि गर्न आवश्यक रहेको बताइन ।

उनले भनिन् “बालविकास शिक्षकहरूलाई सुविधा तथा तालिमको व्यवस्था बुट क्याम्प भनेर राखिएको छ । त्यसलाई पनि सञ्चालन गर्छौँ तर त्यसले मात्रै पुग्दैन । उहाँहरूलाई शिक्षककै रूपमा स्वीकार गरेको छैन यसलाई अन्त्य तत्काल गर्न सक्दैनौँ तर अनिवार्य तथा निःशुल्क शिक्षा ऐनले बालविकास शिक्षकलाई महत्व दिएको छ । त्यो महत्वलाई ध्यान दिएर उहाँहरूको सुविधा कसरी वृद्धि गर्ने बारे कुरा भई रहेको छ । अहिले मैले कम्तीमा केही नभएपनि थोरै गरौँ भनेर अर्थ मन्त्रालयमा अनौपचारिक रूपमा अनुरोध गरेको छु । औपचारिक रूपमा अब पत्र लेखेरै हामीले काम गर्छौ ।”