होटल समूहको सूचकमा ‘अलटाइम हाइ’

साउन ६ , काठमाडौं । सेयर बजार बढ्न थालेसँगै यसअन्तर्गतको एउटा क्षेत्र होटल तथा पर्यटन सूचकले भने ‘अलटाइम हाइ’ विन्दु बनाएको छ । आइतबार समग्र बजारको परिसूचक नेप्से २.५४ प्रतिशत बढ्दा होटल तथा पर्यटन समूहको सूचक ४.२१ प्रतिशत बढ्यो ।

योसँगै होटल तथा पर्यटन समूहको सूचक ६४०४ अंकमा पुगेको छ । यसअघि बजार बन्द हुँदा होटल समूह गत पुस ३ गते हालसम्मकै उच्च ६०८८ विन्दुमा पुगेको थियो भने इन्ट्राडेमा ६१६८ सम्म पुगेको थियो ।यस समूहमा जम्मा ६ वटा कम्पनी सूचीकृत छन् । सूचीकृत कम्पनीमध्ये आइतबार सोल्टी होटलको मूल्य सबैभन्दा ७.२ प्रतिशत बढ्यो । तारागाउँ रिजेन्सीको २.७, ओरियन्टल होटलको २.२, चन्द्रागिरि हिल्सको ३.१, सिटीको २.२ प्रतिशत मूल्य बढ्यो भने कालिन्चोक दर्शनको १ प्रतिशत घट्यो ।

समग्र नेप्से परिसूचक नेप्से २१०६ अंकमा हुँदा गत पुसमा नै होटल तथा पर्यटन समूहले उच्च रेकर्ड बनाएको थियो । त्यसयता नेप्से नै १९६० अंकभन्दा तल झर्न सकेन । नेप्से बढ्दै जाँदा होटल तथा पर्यटन समूहले अघिल्लो उच्चतम रेकर्ड पनि तोड्यो ।

देशमा विदेशी पर्यटकको संख्या बढेकाले यस क्षेत्रका कम्पनीहरुको तेस्रो त्रैमासिक वित्तीय विवरण उत्साहजनक थियो । चौथो त्रैमासिक वित्तीय विवरण पनि राम्रो आउने अपेक्षा लगानीकर्ताको छ ।

होटलहरुको लाभांश वितरण क्षमता पनि बढेकाले यस क्षेत्रमा लगानीकर्ताको आकर्षण देखिएको हो । अर्कोतर्फ जम्मा ६ कम्पनी सूचीकृत हुनु र ती ‘लोक्याप’ कम्पनी भएकाले पनि कम्पनीहरुको मूल्यवृद्धि तुलनात्मक रुपमा बढी हुन गएको देखिन्छ । त्यस्तै आउने सिजनमा विदेशी पर्यटकको संख्या थप बढ्न सक्ने अनुमानले पनि लगानीकर्ता यस क्षेत्रमा आकर्षित देखिएका हुन् ।