त्रिदिवसीय अन्तर्राष्ट्रिय नेपाल भारत संस्कृत सम्मेलन काठमाडौँमा सुरु

नेपाल–भारत अन्तर्राष्ट्रिय संस्कृत सम्मेलन आजबाट काठमाडौंमा सुरु भएको छ । बुधबार काठमाडौंको बूढानीलकण्ठमा सुरु भएको सम्मेलनलाई ऊर्जामन्त्री शक्तिबहादुर बस्नेतले उद्घाटन गरेका थिए ।

तीन दिनसम्म चल्ने सम्मेलनमा नेपाल र भारतका संस्कृतविद्हरूको सहभागिता छ । सम्मेलनलाई नीति अनुसन्धान प्रतिष्ठान नेपाल (नेनाप), केन्द्रीय संस्कृत विश्वविद्यालय र इन्डिया फाउन्डेसनले संयुक्तरूपमा आयोजना गरेकाे हाे ।

सम्मेलनमा नेपाल र भारतका विभिन्न संस्कृत विश्वविद्यालयका उपकुलपतिहरू, संस्कृतका प्राध्यापकहरू, संस्कृतका ज्ञाता विश्लेषकको सहभागिता रहेको छ । सम्मेलनमा नेपाल र भारतमा अहिले संस्कृतमा भइरहेका गतिविधिहरूको विषयमा कार्यपत्रहरूसमेत प्रस्तुत गरिने आयाेजकले जनाएको छ ।

उद्घाटन सत्रमा विभिन्न क्षेत्रका ४०० भन्दा बढी समाजका प्रबुद्ध व्यक्तिहरूकाे महत्त्वपूर्ण  सहभागिता  रहेकाे  थियो । सम्मेलनका सत्रहरूमा दुवै देशका ४०/४० जना गरी ८० जनाको सहभागिता रहने नेपाल संस्कृति विश्वविद्यालयका सहप्राध्यापक एवं सम्मेलनका कार्यक्रम संयोजन प्रेमराज न्यौपानेले  जानकारी दिएका छन् । तीन सम्म चल्ने सम्मेलनले नेपाल र भारतकाे संस्कृत ज्ञान र परम्परालाई अगाडि बढाउने र विश्वमा कसरी संस्कृतिलाई फैलाउने भन्ने विषयमा कार्यदिशा तय गर्ने आयाेजककाे याेजना रहेको छ ।