गणित, विज्ञान र कम्प्युटर शिक्षा अंग्रेजीमा पढाउनुपर्ने नीतिगत व्यवस्था गर्नु नहुने : पाठ्यक्रम विकास केन्द्र

काठमाडौँ । पाठ्यक्रम विकास केन्द्रका महानिर्देशक वैकुण्ठप्रसाद अर्यालले गणित, विज्ञान र कम्प्युटर शिक्षा अंग्रेजीमा पढाउनुपर्ने नीतिगत व्यवस्था गर्नु नहुने बताएका छन् ।

उनले आधारभूत तह १–५ का शिक्षकहरु अझै पनि अंग्रेजी माध्यममा पठनपाठन गराउन सक्ने अवस्थामा नभएको भन्दै यो प्रावधान प्रभावकारी हुन नसक्ने उनले बताए ।

बिहीबार प्रतिनिधिसभा अन्तर्गतको शिक्षा, स्वास्थ्य तथा सूचना प्रविधि समिति बैठकमा बोल्दै पाठ्यक्रम विकास केन्द्रका महानिर्देशक वैकुण्ठप्रसाद अर्यालले गणित, विज्ञान र कम्प्युटर शिक्षा अंग्रेजीमा पढाउनुपर्ने नीतिगत व्यवस्था गर्नु नहुने बताएका हुन् ।

उनले  मातृभाषाको पाठ्यक्रम पढ्नेहरुको संख्यामा पनि कम रहेको बताएका छन् । ” संविधानले मातृभाषामा शिक्षा लिन पाउने हक सुनिश्चित गरेअनुरुप पाठ्यक्रम विकास केन्द्रले मातृभाषामा पढाउन पाठ्यक्रम बनाएर लागू गर्दासमेत मातृभाषामा पढ्नेहरुको संख्यामा कमी देखिएको बताए । उनले भने, ‘संविधानले पनि व्यवस्था गरेको छ, सबै राजनीतिक दलहरुको एक स्वर भएको अवस्था पनि हो कि मातृभाषामा शिक्षा आर्जन गर्ने हकको सुनिश्चित हुनुपर्छ । हामीले अभ्यासमा लैजाने प्रयास गर्‍यौं । तर मातृ भाषामै प्रयोग गर्ने प्रयोगकर्ताहरुमा कमी देखिएको छ ।’

कुनै भाषाको पाँच/सात सय पुस्तक छपाई गर्दा वर्षौंसम्म पनि किताब किन्न आउनेहरु नभएको उनको भनाइ थियो ।

उनले  आज राष्ट्र र राष्ट्रियताप्रति बफादार बनाउनेगरी पाठ्यक्रम बनाउनुपर्ने आवश्यकताको महसुस भएको भन्दै सोहीअनुरुप पाठ्यक्रमहरु परिमार्जन गर्न तयारी गरिरहेको पनि बताएका छन् ।