भगवान श्रीरामकाे मूर्ति प्राणप्रतिष्ठकाे अवसरमा नेपालमा पनि उत्साव मनाइदै

 पुष २३, काठमाडौं । भारतको अयोध्यामा निर्माणाधिन राम मन्दिरमा राखिने रामको नयाँ मूर्तिको प्राण–प्रतिष्ठालाई उत्सवकाे रूपमा  नेपाल भर दीप प्रज्वलन गरि   मनाउने तयारी शुरु भएको छ ।

सोमवार हिन्दु स्वयंसेवक संघ नेपालले सुमार्गि भवन, पशुपति क्षेत्रमा आयोजना गरेको “धार्मिक संघ–संस्था सद्भाव वैठक”मा संघका सह–संघचालक कल्याण तिम्सिनाले भारतमा ५ सय वर्षको संघर्ष पछि अयोध्यामा राम मन्दिर निर्माण भईरहेकोले यसलाई सनातन हिन्दू धर्मावलम्बीले गौरव मान्दै रामको मूर्तिको प्राण–प्रतिष्ठालाई भव्य बनाउन जोड दिनु भयो ।

तिम्सिनाले अयोध्यामा ५ सय वर्षको अवधिमा राम मन्दिर बनाउने संघर्षमा १ लाख ९० हजारभन्दा धेरै हिन्दूले बलिदान दिएकाले आजको पिढीले पाएको प्राण–प्रतिष्ठाको अवसरलाई सामान्य रुपमा नलिन आग्रह गर्नु भयो । उहाँले मन, वचन, कर्मले कर्मठ हिन्दूले हिन्दुत्वको महानता र आदर्शलाई पालना गर्न सक्ने बताउनु भयो ।

आगामी पौष शुक्ल द्वादशी, विक्रम सम्वत् २०८० माघ ८ गते (२२ जनवरी २०२४) सोमबार भगवान् श्री रामको जन्मभूमि अयोध्यामा निर्माण भइरहेको नयाँ मन्दिरको भूतलको गर्भगृहमा भगवान् श्री रामको बाल स्वरूपको नयाँ मूर्तिको प्राण–प्रतिष्ठा गर्ने कार्यक्रम रहेको छ ।

सो अवसरमा अयोध्यामा अभूतपूर्व आनन्दको वातावरण रहनेछ । सो अवसरमा नेपालमा पनि आफ्नो गाउँ, इलाकामा अवस्थित प्रत्येक मन्दिरमा सत्सङ्ग गर्ने, रामभक्तहरूलाई भेला गरी, भजन–कीर्तन, टेलिभिजन वा पर्दा (एल इ डी स्किन) हाल्ने, समाजलाई अयोध्याको प्राण–प्रतिष्ठा समारोह देखाउने, शंख बजाउने, घण्टी बजाउने, आरती गर्ने, प्रसाद वितरण गर्ने जस्ता कार्यक्रम गर्न श्रीराम जन्मभूमी तीर्थ क्षेत्रले आग्रह गरेको छ ।

वैठकलाई संघका कार्यवाह मुरली निरौलाले सम्बोधन गर्नु भएको थियो । वैठकमा विभिन्न धार्मिक संघसंस्थाका प्रतिनिधिहरुको उपस्थिती रहेको थियो ।