चिकित्सा शिक्षा अध्ययनका लागि सहजीकरण गर्न नसके जनशक्ति अभाव हुने

काठमाडौँ , १० मङ्सिर । स्वास्थ्य तथा जनसङ्ख्यामन्त्री मोहनबहादुर बस्नेतले देशभित्रै चिकित्सा शिक्षा अध्ययन अध्यापनका लागि तत्काल सहजीकरण गर्नुपर्ने बताउनुभएको छ । राष्ट्रिय ट्रमा सेन्टरको वार्षिकोत्सवका अवसरमा आयोजित कार्यक्रममा उहाँले चिकित्सा शिक्षा अध्ययनका लागि सहजीकरण गर्न नसके आगामी समयमा देशमा स्वास्थ्य जनशक्ति अभाव हुन सक्ने बताउनुभयो ।

मन्त्री बस्नेतले चिकित्सा अध्ययनका लागि एक सयदेखि तीन सयसम्म शय्याका अस्पताललाई प्यारामेडिक्स र नर्सिङ र तीन सय बढी शय्याका अस्पतालमा मेडिकल अधिकृत पठनपाठनको अनुमति दिन चिकित्सा शिक्षा आयोगलाई मन्त्रालयले गरेको प्रस्ताव स्मरणसमेत गराउनुभयो ।

“यही अवस्था हो भने पाँच वर्षपछि चिकित्सक र नर्स पाइँदैन,” मन्त्री बस्नेतले भन्नुभयो, “स्वास्थ्य क्षेत्रमा रहेको भाँडभैलोलाई हामीले प्रस्ताव राखेको कुरालाई कानुन अनुसार कारबाही हुन सके सातै प्रदेशमा थोरै जनशक्ति थपेर मेडिकल कलेज खोल्न सकिन्छ ।”

उहाँले चिकित्सक एवं स्वास्थ्यकर्मीले उमेरका कारण सेवाबाट अवकाश लिएपछि पनि आफ्नो ज्ञान र अनुभव बाँड्ने अभ्यास जारी राख्न सुझाव दिनुभयो । “नेताहरू कहिल्यै रिटायर्ड भएनन् । ९२ वर्ष उमेरका पनि प्रधानमन्त्री हुनुभयो । तर तपाईहरू किन रिटायर्ड हुने ?,” मन्त्री बस्नेतले चिकित्सकतर्फ लक्षित गर्दै भन्नुभयो । उहाँले ट्रमा सेन्टरलाई आवश्यक स्वास्थ्य उपकरण उपलब्ध गराउनेसमेत प्रतिबद्धता व्यक्त गर्नुभयो ।

चिकित्सा विज्ञान राष्ट्रिय प्रतिष्ठान (न्याम्स) का उपकुलपति प्रा.डा. भूपेन्द्रकुमार बस्नेतले दक्ष जनशक्तिको उत्पादन, भरपर्दो, विश्वसनीय, गुणस्तरीय साथै विशेषज्ञ सेवा प्रवाह गर्न सुझाव दिनुभयो । मन्त्रालयले स्वास्थ्य क्षेत्रमा जनशक्ति उत्पादनका लागि नर्सिङ पारामेडिकल र एमबिबिएस शैक्षिक कार्यक्रम सञ्चालनका लागि राखेको प्रस्तावप्रति उहाँले आभारसमेत प्रकट गर्नुभयो ।

सेन्टरका निर्देशक डा. बद्री रिजालले ट्रमा उपचार केन्द्रसँग समन्वय र सहकार्य गर्ने गरी सेन्टरलाई ट्रमासम्बन्धी उपचार एवं अध्ययन अनुसन्धानका लागि सेन्टर अफ एक्सिलेन्स’ का रूपमा विकास गर्न मन्त्रीको ध्यानाकर्षण गराउनुभयो ।

“जनसङ्ख्या वृद्धि, प्राकृतिक प्रकोपमा बढोत्तरी, विपत्ति आदि कारणले हुने दुर्घटनाजन्य बिरामीको चापमा हुने वृद्धिका कारण यस सेन्टरको क्षमता विस्तार गर्दै नयाँ प्रविधिसहित सेवा प्रवाह गर्न सम्बन्धित निकायले विशेष ध्यान दिन जरुरी रहेको छ,” डा. रिजालले भन्नुभयो, “नेपाल सरकारको पछिल्लो नीति अनुसार प्राथमिक ट्रमा उपचार केन्द्रसहित देशैभर विभिन्न स्थानमा ट्रमा सेन्टर तत्काल स्थापना गनुपर्ने आवश्यकता रहेको छ ।“

वार्षिकोत्वका अवसरमा पूर्वनिर्देशक डा. अशोकरत्न वज्राचार्य, डा. बुलन्द थापा, डा. प्रमोदकुमार उपाध्याय र नर्सिङ सेवातर्फ रत्नमाया सुवाललाई सेन्टरले सम्मान गरेको थियो । सेन्टरबाट आर्थिक वर्ष २०७९÷८० मा एक लाख चार सय २७ जनाले स्वास्थ्योपचार सेवा लिएका छन् ।

बहिरङ्ग सेवा लिने बिरामीको सङ्ख्या ८२ हजार ९७८ जना र आकस्मिक सेवा लिने १७ हजार ४४९ जना छन् । अधिकांश बिरामी बागमती, मधेश, कोशी र गण्डकी प्रदेश रहेका छन् । रासस