निजगढका केरा किसानहरुव्दारा आन्दोलनको कार्यक्रम सार्वजनिक

बीमा कम्पनीले केरा बालीको बीमा गर्न इन्कार गरेपछि आन्दोलित बनेका निजगढका केरा खेती गर्ने किसानहरुले हिमालयन एभरेष्ट बीमा कम्पनीको सिमरास्थित कार्यालयमा तालाबन्दी गर्ने भएका छन ।

आन्दोलनको अगुवाइ गर्दैआएको बारा केरा तथा फलफूल उत्पादन संघले निजगढमा पत्रकार सम्मेलनको आयोजना गरेर श्रावण ८ गते बीमा कम्पनीको कार्यालयमा तालाबन्दी गर्ने जानकारी दिएको हो ।

संघका अध्यक्ष एकबहादुर श्रेष्ठले आन्दोलनको पहिलो चरण अन्तर्गत श्रावण ५ र ६ गते किसान जागरण कार्यक्रम संचालन गर्ने, श्रावण ७ गते निजगढस्थित पूर्वपश्चिम राजमार्गमा किसान ¥याली तथा कोण सभा र त्यसपछि पनि माग पुरा नभए कम्पनीको कार्यालयमा तालाबन्दी गर्ने पत्रकार सम्मेलनमा जानकारी दिए ।

पत्रकार सम्मेलनमा संघका सदस्य गोविन्द खरेल, मानबहादुर श्रेष्ठ, साधुराम खरेल र माधव न्यौपाने लगायतको उपस्थिति रहेको थियो । जिल्ला प्रशासन कार्यालय बाराका प्रमुख जिल्ला अधिकारी नवराज सापकोटालाई भेटेर ज्ञापनपत्र बुझाएको संघले एक साताभित्र पनि माग पुरा नभएपछि पत्रकार सम्मेलनमार्फत आन्दोलनको कार्यक्रम सार्वजनिक गरेको हो ।

सरकारले घोषणा गरेको बीमा कार्यक्रमअनुसार बारा जिल्लामा बाली बीमाको जिम्मा पाएको हिमालय एभरेष्ट बीमा कम्पनीले किसानको केराबालीको बीमा गर्न इन्कार गरेपछि संघले सडक आन्दोलनमा उत्रिने चेतावनीसहित जिल्ला प्रशासन कार्यालयसहित कृषि तथा पशुपंक्षी मन्त्रालय, बीमा प्राधिकरण, हिमालयन एभरेष्ट बीमा कम्पनी र मन्त्रालय, बीमा प्राधिकरण र निजगढ नगरपालिकाकाको कार्यालयमा ज्ञापनपत्र बुझाएको थियो ।

हिमालयन एभरेष्ट बीमा कम्पनीका कर्मचारीहरुले ‘माथिको आदेश’ भन्दै बीमा गर्न गएका किसानको केरा खेतीको बीमा नगरी फर्काएपछि निजगढका किसानहरु आन्दोलित बनेका हुन ।