त्रिभुवन विश्वविद्यालयका उपप्राध्यापक प्रेम चलाउने आमरण अनशन

त्रिभुवन विश्वविद्यालयका उपप्राध्यापक प्रेम चलाउनेले आमरण अनशन सुरु गरेका छन् । काठमाडौं जिल्ला अदालत परिसरमा अनशन बस्न प्रहरीले रोकेपछि उनले सोमबार साँझ विश्वविद्यालयका उपकुलपतिको कार्यालयअगाडि आमरण अनशन सुरु गरेका हुन् ।

चलाउनेविरुद्ध ज्यान मार्ने उद्योग आरोपमा मुद्दा खेपिरहेका नेपाल विद्यार्थी संघका कार्यकर्ताविरुद्धको मुद्दा सरकारले फिर्ता लिने निर्णय गरेपछि उनी आमरण अनशन बसेका हुन् ।

काठमाडौं जिल्ला अदालतमा आमरण अनशनमा बसेका चलाउनेलाई सोमबार दिउँसो प्रहरीले नियन्त्रणमा लिएको थियो ।

समाजशास्त्रका उपप्राध्यापक चलाउनेमाथि २०७७ असोज २० मा त्रिवि परिसर कीर्तिपुरमा आक्रमण गरेको आरोप लागेका नेविसंघका हरि आचार्य, योगेन्द्र रावलसहित ५ जनाविरुद्ध जिल्ला अदालत काठमाडौंमा मुद्दा थियो । यो मुद्दा सरकारले फिर्ता लिएको छ ।