काठमाडौं विश्वविद्यालयमा पूर्व प्राथमिक शिक्षकका लागि सर्ट कोर्स सञ्चालनमा

फागुन  १७, काठमाडौं ।  पूर्व प्राथमिक शिक्षक र शिक्षिकाहरुलाई लक्षित गरि काठमाडौं विश्वविद्यालय स्कुल अफ एजुकेशनले “प्रोफेसनल डेभलपमेन्ट फर अर्लि चाइल्ड एडुकेटर्स” कोर्स सञ्चालनमा ल्याएको छ । शिक्षक शिक्षिकाहरुको सिकाउने सीपको विकास र सशक्तिकरणका लागि यो कोर्सको डिजाइन गरि सञ्चालनमा ल्याएको हो ।

एउटा कक्षा कोठामा विविध पृष्ठभूमीबाट बालबालिकाहरू आउनुभएको हुन्छ, त्यसैले उहाँहरुको आवश्यकता पनि भिन्न भिन्न हुन्छ र हरेकले फरक तरिकाले सिक्नुहुन्छ । बच्चाको उमेर अनुसारको विकास हुन्छ र पूर्व प्राथमिक शिक्षक शिक्षिकाहरुले यो कुरा जान्नु आवश्यक छ । त्यसैगरि हाम्रो सिकाउने शैली बालबालिकाको उमेर र आवश्यकता अनुसार फरक हुन्छ , साथै सिकाईको क्रममा हामीले बालबालिकाको चौतर्फि विकासलाई ध्यान दिन आवश्यक छ ।

हामीले सिकाउने विषयहरु बालबालिकाको जीवनसँग मेल खाने हुनु पर्दछ जसले गर्दा सिकाई अर्थपूर्ण हुन्छ । यसको लागि एकिकृत पाठ्यक्रम (इन्टिग्रेटेड लर्निङ करिकुलम) ले महत्वपूर्ण भूमिका खेलेको हुन्छ । यसको अतिरिक्त पूर्व प्राथमिक तहमा अध्ययनरत विद्यार्थीहरूको भाषिक विकास (अंग्रेजी र नेपाली) ले पनि चौतर्फि सिकाईमा विषेश भूमिका खेलेको हुन्छ ।

देशका अधिकांश विद्यालयहरुमा शिक्षक शिक्षिकाहरुले बालबालिकाको सिकाईको मूल्यांकन सहि ढंगले गर्न नजान्दा विषय कण्ठस्थ गर्न बाध्य गराइन्छ ।

त्यसैले काठमाण्डौं विश्वविद्यालयले माथिका सबै कुराहरु ध्यानमा राखि शिक्षक शिक्षिकाहरुको सिकाउने सीपको विकास र सशक्तिकरणका लागि यो कोर्ष डिजाइन गरेको छ ।

यो कोर्षका मुख्य उदेश्यहरु बालमनोविज्ञानको बुझाई, प्रभावकारी कक्षाकोठा व्यवस्थापन योजना, एकिकृत पाठ्यक्रमको विकास, नविनतम सिकाई र बुझाई प्रकृया तथा बालबालिकाको प्रभावकारी मूल्यांकनका विधिहरुमा केन्द्रित हुनेछ ।