राजर्षिजनक विश्वविद्यालयको प्रथम दीक्षान्त समारोह जेठ २७ मा हुने

शिक्षा संचार

२४ जेष्ठ २०८२, शुक्रबार १९:५२

जनकपुर । राजर्षिजनक विश्वविद्यालयको प्रथम दीक्षान्त समारोह जेठ २७ गते हुने भएको छ ।जनकपुरधामस्थित महेन्द्रनारायण निधि मिथिला संस्कृति केन्द्रमा मङ्गलवार हुने दीक्षान्त समारोहमा प्रधानमन्त्री एवम् विश्वविद्यालयका कुलपति केपी शर्मा ओलीले स्नातक तथा स्नातकोत्तर तह उत्तीर्ण विद्यार्थीहरूलाई दीक्षित गर्ने कार्यक्रम तय भएको हो ।

यो विश्वविद्यालयको पहिलो तथा ऐतिहासिक दीक्षान्त समारोहलाई भव्य तथा व्यवस्थित बनाउन रजिष्ट्रार सत्यनारायण साहको संयोजकत्वमा डीनहरू, परीक्षा नियन्त्रण, सह–नियन्त्रणहरू तथा कर्मचारीहरू सम्मिलित १५ सदस्यीय मूल समिति गठन गरिएको छ । साथै, प्राध्यापक, कर्मचारी तथा विद्यार्थी सम्मिलित १६ वटा उपसमिति बनाइएका छन् ।

केन्द्रीय परीक्षा सञ्चालन तथा अभिलेख केन्द्रका अनुसार स्नातक तथा स्नातकोत्तर तह उत्तीर्ण तीन ब्याचका १ सय १५ विद्यार्थी दीक्षित हुन लागेका हुन् । २०८२ साल जेठ ५ गतेसम्म विभिन्न शैक्षिक कार्यक्रममा उत्तीर्ण गरी ट्रान्सक्रिप्ट लिइसकेका विद्यार्थीहरूले दीक्षित हुन फारम भर्न पाउने पनि केन्द्रले जनाएको छ । दीक्षित हुने विद्यार्थीले दुई जनासम्म अभिभावकलाई पनि समारोहमा सहभागी गराउन सक्ने व्यवस्था मिलाइएको छ ।

समारोहमा विश्वविद्यालय स्तरमा उत्कृष्ट हुने चार, विभिन्न सङ्काय तथा शैक्षिक कार्यक्रममा उत्कृष्ट हुने १०–१० विद्यार्थीलाई पदकसमेत प्रदान गरिने सह परीक्षा नियन्त्रक दिलिपकुमार यादवले जानकारी दिए ।

विश्वविद्यालयका उपकुलपति प्रा. डा. अमरप्रसाद यादवले यो विश्वविद्यालयको पहिलो र ऐतिहासिक दीक्षान्त समारोह रहेकाले यसलाई स्मरणीय बनाउने गरी तयारी भइरहेको जानकारी दिए ।