शिक्षकको पेसागत विकासका लागि हिमालय स्कुल र काठमाडौँ विश्वविद्यालयको सहकार्य

गुणस्तरीय शिक्षा र शिक्षकहरूको निरन्तर व्यावसायिक विकासको गर्ने उदेश्यले हिमालय स्कुल र काठमाडौँ विश्वविद्यालय स्कुल अफ एजुकेशनबिच सहकार्य हुने भएको छ । सहकार्यमा शिक्षकहरूलाई उन्नत प्रशिक्षण प्रदान गर्नु, उनीहरूको शैक्षिक सीपलाई सुदृढ गर्नु र प्रभावकारी सिकाइ वातावरण सिर्जना गर्न आवश्यक उपकरणहरूसँग उनीहरूलाई सुसज्जित गरिने रहेको हो ।

विश्वविद्यालयमा रहेको निरन्तर तथा पेसागत शिक्षा केन्द्र (सिपिइसी) मार्फत विद्यालयको आवश्यकता पहिचान, कार्ययोजना निर्माण, शैक्षणिक कार्यशाला, परामर्श, निरन्तर अनुगमन(मूल्याङ्कन तथा पृष्ठपोषण, विद्यालयको शैक्षिक लेखा परीक्षण जस्ता कार्यसम्पादनार्थ विद्यालयसँग निरन्तर सहकार्य गर्ने र शिक्षकहरूको पेसागत अभिवृद्धि गर्ने हेतुले यो सहकार्य गरिएको विश्वविद्यालयले जनाएको छ ।

काठमाडौँ विश्वविद्यालयका तर्फबाट डिन प्रा.डा. बालचन्द्र लुईटेल र हिमालय विद्यालयका तर्फबाट प्रिन्सिपल राम हरि सिलवालसँगै विद्यालयका प्रमुख प्रबन्ध निर्देशक नरेन्द्रबहादुर अधिकारीले सम्झौतापत्रमा हस्ताक्षर गरेका छन् ।

प्रा. डा.लुईटेलले यस सहकार्यबाट शिक्षकको पेसागत सीप अभिवृद्धि, विद्यार्थीको शैक्षिकस्तर सुधार तथा २१ औँ शताब्दीका सीपहरू एवम् सेवा आदान प्रदान हुने कुरा व्यक्त गरे । विद्यालयका तर्फबाट विद्यालयका प्रिन्सिपल रामहरि सिलवालले विश्वविद्यालयसँगको यस सहकार्यले शिक्षा आर्जनका निम्ति विद्यालयमा आएका सम्पूर्ण बालबालिकाहरूले गुणस्तरीय शिक्षा प्राप्त गर्न सक्ने तथा शिक्षक, विद्यार्थी एवम् विद्यालयको सर्वाङ्गीण विकासमा महत्वपूर्ण योगदान पुग्ने दृढ विश्वास रहेको बताए ।