‘त्रिविका पदाधिकारीलाई सुरक्षा थ्रेट कसले दियो ?’ स्ववियुले जवाफ खोज्ने

काठमाडौँ । त्रिभुवन विश्वविद्यालय स्वतन्त्र विद्यार्थी युनियन (स्ववियु) ले  पदाधिकारीहरूलाई कोबाट सुरक्षा थ्रेट आयो भन्ने विषयमा जवाफ माग गर्ने भएको छ । विश्वविद्यालयका पदाधिकारीहरूले विद्यार्थीबाट सुरक्षा थ्रेट आएको बताइरहेका बेला स्ववियुले कुन विद्यार्थीबाट ? कस्तो खालको थ्रेट आएको भन्ने विषयमा जवाफ माग गर्ने भएको हो ।

स्ववियु सभापति श्यामराज ओझाले विश्वविद्यालयमा सुरक्षा थ्रेट आएको खण्डमा आफूहरू चुप लागेर नबस्ने बताउँदै उनले भने, ‘कसले ? के थ्रेट दियो ? त्यसको नाम सार्वजनिक गर्नुपर्छ । विश्वविद्यालयले थ्रेट आयो भनेर मिडियाबाजी गर्दै हिँड्ने, तर, कसले दियो धम्की त्यो बारेमा हामी जवाफ खोज्छौँ । जवाफ नआउँदासम्म हामी चुप लागेर बस्दैनौं ।’

अन्यथा मनलाग्दी तरिकाले विद्यार्थीद्वारा थ्रेट आयो भनेर विद्यार्थी राजनीतिलाई नै घृणित बनाउने काम भइरहेको उनको भनाइ छ । सत्यतथ्य के हो भन्ने विषयमा विश्वविद्यालयले अहिलेसम्म आधिकारिक व्यक्तव्य जारी नभएको बताउँदै उनले विद्यार्थी राजनीतिलाई घृणित बनाउने मनसायले त्रिविका पदाधिकारीहरू लागिरहेको बताए ।

शिक्षामन्त्रीले नै विश्वविद्यालय सुरक्षित नरहेको बताउँदै सामाजिक सञ्जालमा स्टाटस लेखेको भन्दै कोबाट असुरक्षित भएको त्यो पनि प्रष्ट पार्नुपर्ने बताए

स्ववियुले विश्वविद्यालय सुरक्षित छ भनेर शिक्षामन्त्रीले कहिले लेख्ने भनेर प्रश्न गरे । ‘फेसबुकमा असुरक्षित घोषणा भएको विश्वविद्यालयमा कसरी पढ्ने ? यदि सच्चिकै असुरक्षित विश्वविद्यालय भए के शिक्षक विद्यार्थी सुरक्षित नभईकन पढ्न बाध्य बनाउने हो ? यो विषयमा जवाफ दिनुपर्छ,’ ओझाले भने ।

स्ववियुले आजको विश्वविद्यालय विमर्शमा विश्वविद्यालयमा सुरक्षा थ्रेट विषयमा छलफल गर्न लागेको छ । साढे ५ बजेबाट सुरु हुने विमर्शमा विद्यार्थीहरूले नै सके साँच्चिकै विश्वविद्यालयमा सुरक्षा थ्रेट बढेको हो ? बढेको हो भने कोबाट बढेको हो ? भन्ने विषयमा छलफल हुने सभापति ओझाले बताए ।

त्रिविका उपकुलपति प्राडा केशरजंग बराल, रेक्टर प्राडा खड्क केसी, रजिष्ट्रार प्राडा केदार रिजाल लगायतका अधिकारीहरूले सुरक्षा थ्रेट बढेको बताउँदै आएका छन् । त्रिविले सुरक्षा व्यवस्था मिलाइदिन अनुरोध गर्दै शिक्षामन्त्रीलाई नै पत्र लेखेको थियो ।

त्यसपछि शिक्षामन्त्री विद्या भट्टराईले गृहमन्त्री रमेश लेखकलाई सामाजिक सञ्जाल फेसबुकमार्फत नै सुरक्षा प्रबन्ध मिलाइदिन अनुरोध गरेकी थिइन् ।