नुवाकोट १ ख मा कांग्रेसबाट कुमार गुरुङ समानुपातिक जनजातिमा पहिलो नम्बरमा सिफारिस

भदौ २१, काठमाडौं । आगामी मंसिर ४ गते आम निर्वाचनको लागि नेपाली कांग्रेस नुवाकोटले प्रत्यक्ष र समानुपातिक उम्मेदवारको नाम बागमती प्रदेश समितिमा पठाएको छ ।

नेपाली कांग्रेस जिल्ला कार्यसमिति नुवाकोटको बैठकले क्षेत्रीय समितिबाट सिफारिस भइ आएको उम्मेदवारको नाम बागमती प्रदेशमा पठाउने निर्णय गरेको हो ।

जसमा नेपाली कांग्रेसको महाधिवेशन प्रतिनिधि रहेका कुमार गुरुङ नुवाकोट–१ प्रदेश ‘ख’ बाट समानुपातिक सूचीको पहिलो नम्बरमा परेका छन् ।

नुवाकोट क्षेत्र नं १ प्रदेश ‘ख’ बाट जनजातीको तर्फबाट पहिलो नम्बरमा परेका हुन् उनी ।

राजनीतिसँगै व्यवसायमा समेत सक्रिय रहेका कुमारको राजनीतिक यात्रा २०५२ सालबाट सुरु हुन्छ । राजनीतिक परिवारमा जन्मिएका कुमार २०५२ सालमा नुवाकोटको साविक लच्याङ गाविसबाट नेपाली कांग्रेसको भातृसंगठन नेपाल विद्यार्थी संघको क्षेत्रीय प्रतिनिधि बनेका थिए । त्यसैगरी २०५४ मा इकाई सभापति हुँदै नुवाकोट–काठमाडौं सम्पर्क समितिको उप–सभापति समेत भएका छन् ।

गत मंसिरमा सम्पन्न कांग्रेसको १४आँै महाधिवेशनमा महाधिवेशन प्रतिनिधि बनेका उनी गत स्थानीय निर्वाचनमा सूर्यगढी गाउँपालिका प्रमुखका लागि सशक्त दाबेदार रहेका थिए ।

उनका पिता लक्ष्मण गुरुङ २०५४ मा साबिक लच्याङ गाविसका नेपाली कांग्रेसबाट जननिर्वाचित वडा अध्यक्ष थिए । त्यसैले पनि राजनीति लाई उनले नजिकै बाट बुझ्न पाएका थिए।

यता उच्च शिक्षा अध्ययनका लागि काठमाडौंको शंकरदेवमा भर्ना भएका उनी विस्तारै राजनीतिसँगै व्यवसायमा समेत सक्रिय बन्न थाले ।

दरबारमार्ग व्यवसाय संघको संयोजक रहेका उनी एक सफल व्यवसायी मानिन्छन् । साथै व्यवसाय गर्न चाहने युवाहरुको लागि प्रेरणाको स्रोत समेत हुन् कुमार । उनले राजधानीको मुटु दरबारमार्गमा ‘किङ्स लाउन्ज’ सञ्चालनमा ल्याएका छन् । राजनीति व्यवसाय मात्र नभएर सामाजिक कार्यमा पनि उत्तिकै सक्रिय रहेका कुमार विभिन्न सामाजिक संघ संस्थाहरुमा समेत आवद्ध रहेका छन् । लायन्स क्लब, रोटरी क्लबजस्ता सामाजिक संस्थामार्फत उदीयमान समाजसेवीको छवि बनाउन सफल छन्।

व्यवसाय र समाजसेवामा सफल बनेका कुमार अब राजनीतिमार्फत समाज रुपान्तरणको बाटोमा लाग्ने तयारीमा रहेका छन् । हरेक राजनीतिक गर्नेहरुको आफ्नै पेशा व्यवसाय होस् भन्ने चाहना राख्ने कुमार युवा नेतृत्वले नै मुलुकको कायापलट गर्ने विश्वास राख्द छन् । साथै जोस् भएको युवाहरु हात बाँधेर राजनीतिको फोहोर सफा गर्न मैदानमा आउनुपर्ने सपना देख्छन् ।

उनी भन्छन्, ‘अब राजनीतिक सुधार्ने हो र मुलुकको कायालपट गर्ने हो भने युवा नेतृत्वको विकल्प छैन।’