काठमाडौंमा आत्मनिर्भर अर्थतन्त्र र सुशासनमुखी बजेटबारे अर्थ संगोष्ठी सम्पन्न

काठमाडौं । नेपाल प्रथम राष्ट्रिय अभियानको आयोजनामा “आत्मनिर्भर अर्थतन्त्र र सुशासनका लागि बजेट २०८३” विषयक एकदिवसीय अर्थ संगोष्ठी आज काठमाडौंमा सम्पन्न भएको छ। आगामी आर्थिक वर्षको बजेटलाई थप प्रभावकारी, समावेशी र उत्पादनमुखी बनाउने उद्देश्यले आयोजना गरिएको कार्यक्रममा विभिन्न क्षेत्रका विज्ञ तथा अर्थविद्हरूको उल्लेखनीय सहभागिता रहेको थियो।

कार्यक्रममा राष्ट्रिय योजना आयोगका निवर्तमान उपाध्यक्ष डा. प्रकाश कुमार श्रेष्ठ, त्रिभुवन विश्वविद्यालय सेडाका निर्देशक प्रा.डा. अर्जुन कुमार वराल, त्रिवि अर्थशास्त्र केन्द्रीय विभागका सहप्राध्यापक डा. प्राम्शु नेपाल, कोटेश्वर बहुमुखी क्याम्पसका उपप्राध्यापक डा. केशवराज पन्थी तथा वित्तीय क्षेत्रका विज्ञ अर्पण पौडेल लगायतको उपस्थिति रहेको थियो।

संगोष्ठीमा प्रस्तुत कार्यपत्रहरूमा मुलुकको वर्तमान आर्थिक अवस्था, उत्पादन वृद्धि, रोजगारी सिर्जना, निजी क्षेत्रको प्रवर्द्धन, राजस्व प्रणाली सुधार, सार्वजनिक खर्चको प्रभावकारिता तथा सुशासन प्रवर्द्धनका विषयहरूमा गहन छलफल गरिएको थियो। सहभागीहरूले आत्मनिर्भर अर्थतन्त्र निर्माणका लागि कृषि, उद्योग, पर्यटन र सूचना प्रविधि क्षेत्रमा लगानी वृद्धि गर्नुपर्नेमा जोड दिएका थिए।

कार्यक्रमका वक्ताहरूले आगामी बजेटमा जनमुखी नीति, पारदर्शिता, वित्तीय अनुशासन र दीगो विकासका पक्षहरूलाई प्राथमिकता दिनुपर्ने सुझाव दिएका छन्। साथै, संघ, प्रदेश र स्थानीय तहबीच समन्वय सुदृढ गर्दै विकास कार्यक्रमलाई प्रभावकारी कार्यान्वयनमा लैजानुपर्ने धारणा व्यक्त गरिएको थियो।

संगोष्ठीबाट प्राप्त कार्यपत्र र सुझावहरूलाई समेटी नेपाल सरकार, अर्थ मन्त्रालयलाई औपचारिक रूपमा पेश गरिने आयोजकले जनाएको छ। उक्त पहलले आगामी बजेट निर्माण प्रक्रियामा नीतिगत सुधार र दीर्घकालीन आर्थिक स्थायित्वका लागि महत्वपूर्ण योगदान पुर्‍याउने अपेक्षा गरिएको छ।